ગુજરાત રાજ્ય માર્ગ વાહન વ્યવહાર નિગમ (એસટી) દ્વારા કંડક્ટરની ભરતી પ્રક્રિયા શરૂ થતાં નોકરી મેળવવા ઇચ્છુક યુવાનોમાં ભારે ઉત્સાહ જોવા મળી રહ્યો છે. ભરતી પ્રક્રિયામાં જરૂરી એવા ફર્સ્ટ એડ (પ્રાથમિક સારવાર) તાલીમના પ્રમાણપત્ર માટે જામનગર સ્થિત રેડ ક્રોસ સોસાયટી ખાતે રાજ્યભરના વિવિધ જિલ્લાઓમાંથી મોટી સંખ્યામાં યુવાનો ઉમટી પડ્યા હતા.
જામનગર રેડ ક્રોસ સોસાયટી ખાતે છેલ્લા કેટલાક દિવસોથી તાલીમ અને તાલીમ પૂર્ણ કર્યાના પ્રમાણપત્ર મેળવવા માટે યુવાનોની ભારે ભીડ જોવા મળી રહી છે. એસટી કંડક્ટરની ભરતીમાં ફર્સ્ટ એડ તાલીમનું પ્રમાણપત્ર જરૂરી હોવાને કારણે અનેક ઉમેદવારો વહેલી સવારથી જ રેડ ક્રોસ સોસાયટીના કાર્યાલય બહાર પહોંચી ગયા હતા.
રાજકોટ, જુનાગઢ, દ્વારકા, પોરબંદર, ભાવનગર, સુરેન્દ્રનગર સહિત રાજ્યના વિવિધ વિસ્તારોમાંથી યુવાનો જામનગર પહોંચ્યા હતા. જોકે રેડ ક્રોસ સોસાયટી પાસે તાલીમ આપવા માટેની બેઠક વ્યવસ્થા, ટ્રેનર અને અન્ય સંસાધનો મર્યાદિત હોવાને કારણે એકસાથે તમામ ઉમેદવારોને તાલીમમાં સમાવેશ કરવો શક્ય બન્યો ન હતો.
View this post on Instagram
મોટી સંખ્યામાં પહોંચેલા યુવાનોને પ્રવેશ ન મળતા કેટલાક ઉમેદવારોમાં રોષની લાગણી પણ જોવા મળી હતી. યુવાનો દ્વારા વધુ બેચ શરૂ કરવા તેમજ તાલીમની વ્યવસ્થા વિસ્તૃત કરવાની માંગ ઉઠાવવામાં આવી હતી. બીજી તરફ રેડ ક્રોસ સોસાયટીના હોદ્દેદારોએ ઉમેદવારોને પોતાની મર્યાદાઓ અંગે માહિતગાર કર્યા હતા અને ઉપલબ્ધ ક્ષમતા મુજબ જ તાલીમ આપી શકાય તેમ હોવાનું જણાવ્યું હતું.
પરિસ્થિતિને ધ્યાનમાં રાખીને મામલતદાર કચેરીના અધિકારીઓ તથા પોલીસ તંત્ર પણ સ્થળ પર દોડી આવ્યું હતું. અધિકારીઓએ યુવાનો સાથે ચર્ચા કરી રેડ ક્રોસ સોસાયટીના નિયમો, તાલીમની મર્યાદિત ક્ષમતા અને પ્રક્રિયા અંગે સમજણ આપી હતી. પોલીસ દ્વારા પણ શાંતિપૂર્ણ રીતે ભીડનું સંચાલન કરવામાં આવ્યું હતું.
અંતે અધિકારીઓ અને રેડ ક્રોસ સોસાયટીના પ્રતિનિધિઓ દ્વારા યુવાનોને આગામી બેચ અને તાલીમની પ્રક્રિયા અંગે માહિતી આપવામાં આવતા સ્થિતિ સામાન્ય બની હતી. જોકે ભરતી પ્રક્રિયા દરમિયાન ફર્સ્ટ એડ તાલીમ માટે વધતી માંગને ધ્યાનમાં રાખીને વધુ કેન્દ્રો શરૂ કરવા અથવા તાલીમની ક્ષમતા વધારવાની જરૂરિયાત સ્પષ્ટપણે સામે આવી છે.
એસટી કંડક્ટર ભરતીને લઈને યુવાનોમાં ભારે ઉત્સાહ જોવા મળી રહ્યો છે અને જરૂરી પ્રમાણપત્ર મેળવવા માટે રાજ્યભરમાંથી જામનગર પહોંચેલા ઉમેદવારોની ભીડે રેડ ક્રોસ સોસાયટીની કામગીરી અને ઉપલબ્ધ વ્યવસ્થાઓ પર વધારાનો ભાર ઊભો કર્યો હોવાનું પણ સામે આવ્યું છે.
