હવે કેદારનાથના દર્શન માટે ઓછું ચાલવું પડશે

આવતા માસથી શરૂ થનારી હિન્દુઓની પવિત્ર ચારધામ યાત્રામાં શ્રદ્ધાળુઓને મહત્વની રાહત મળશે. કેદારનાથના પગપાળા રૂટનું અંતર 8 કી.મી. ઓછું થઈ ગયું છે. ઉતરાખંડના મુખ્યમંત્રી પુષ્કરસિંહ ધામીએ કેદારનાથની મુલાકાત લઈને વિવિધ યોજનાઓની સમીક્ષા કરી હતી. આ દરમ્યાન તેઓએ ગૌરીકુંડથી રામબાડા અને ચૌમાસી કાલીમઠ સુધી રોડ બનાવવાની જાહેરાત કરી હતી.

રામબાડા સુધી રોડનું નિર્માણ થવાને પગલે પગપાળા અંતર 8 કી.મી. ઓછું થઈ જશે અને કેદારનાથ પહોંચવા માત્ર 8 કી.મી.ની પગપાળા યાત્રા કરવી પડશે. અત્યારે કેદારનાથની પગપાળા યાત્રા માટે 16 કી.મી. નું અંતર કાપવું પડે છે. હવે નવા માર્ગના નિર્માણ પછી તે માત્ર 8 કી.મી.નું રહી જશે. આ ઉપરાંત રામબાડાથી કેદારનાથ સુધીના રોપવે નિર્માણની પણ વિચારણા કરવામાં આવી રહી છે. આ યોજના લાગુ થવાના સંજોગોમાં કેદારનાથના યાત્રાળુઓને નવી સુવિધા મળી શકે છે.