પરમ પવિત્ર શ્રાવણ માસના બીજા સોમવારે છોટીકાશીના શિવાલયોમાં આયોજિત શૃંગાર દર્શનોનો લાભ લેવા મહાદેવના ભક્તોની ભારે ભીડ ઉમટી પડી હતી. ગઇકાલે શ્રાવણ માસના બીજા સોમવારે વહેલી સવારથી જ શિવભક્તોએ શિવજીના ચરણોમાં શિર ઝુકાવવા દોટ મૂકી હતી. શહેરના અનેક શિવ મંદિરોમાં શ્રાવણી સોમવાર નિમિત્તે વિવિધ શ્રૃંગાર દર્શન, મહાપૂજા, રૂદ્રાભિષેક સહિતના કાર્યક્રમો યોજાયા હતાં.
છોટીકાશી તરીકે પ્રસિધ્ધ એવા જામનગરમાં ગઇકાલે શ્રાવણ માસના બીજા સોમવારે કુબેરભંડારી મહાદેવ, ઓમકારેશ્વર મહાદેવ, ગૌરીશંકર મહાદેવ, રામેશ્વર મહાદેવ, બેડેશ્વર મહાદેવ, સિધ્ધનાથ મહાદેવ, કાશી વિશ્વનાથ મહાદેવ, ભીડભંજન મહાદેવ સહિતના અનેક નાના-મોટા શિવમંદિરોમાં ફૂલોના શ્રૃંગાર, કૈલાશ દર્શન, અન્નકોટ દર્શન સહિતના આકર્ષક શ્રૃંગાર તેમજ વિવિધ કાર્યક્રમોનું આયોજન કરવામાં આવ્યું હતું. આ સુપ્રસિધ્ધ અને પૌરારિક શિવાલયોમાં વિવિધ શ્રૃંગાર દર્શન તેમજ શિવપૂજનનો લ્હાવો લેવા છોટીકાશીના ધર્મપ્રેમીઓ ઉમટી પડયા હતાં અને કતારમાં ઉભા રહ્યાં બાદ પણ શિવજીના દર્શનોનો આનંદ માણ્યો હતો. આ ઉપરાંત દેવભૂમિ દ્વારકા નજીક આવેલા દ્વાદશ જ્યોર્તિલિંગ નાગેશ્વર મહાદેવ મંદિરે પણ પવિત્ર શ્રાવણ માસના બીજા સોમવારે નયનરમ્ય પુષ્પશ્રૃંગાર દર્શન યોજાયા હતાં.
