જામનગરની સાધના કોલોનીમાં આવેલ ગુજરાત હાઉસિંગ બોર્ડના બિલ્ડીંગમાં જર્જરીત મકાનો તોડી પાડવા આજે જામ્યુકોની એસ્ટેટ શાખા તેમજ ગુજરાત હાઉસિંગ બોર્ડના અધિકારીઓ પહોંચ્યા હતાં. આ દરમિયાન રહેવાસીઓ દ્વારા વિરોધ કરી વૈકલ્પિક વ્યવસ્થા કરી આપવા માગણી કરી હતી. આ દરમિયાન વિરોધ કરી રહેલ રહેવાસીને ચક્કર આવી પડી જતાં 108 એમ્બ્યુલન્સ બોલાવવામાં આવી હતી.
જામનગરના ન્યુ સાધના કોલોની વિસ્તારમાં આવેલ ગુજરાત હાઉસિંગ બોર્ડના બિલ્ડીંગમાં એમ-56 તથા એમ-63 નંબરના બે બ્લોકમાં આવેલ કુલ 24 ફલેટ ખૂબ જ જર્જરીત હાલતમાં હોય, આજે સવારે ચુસ્ત પોલીસ બંદોબસ્ત સાથે જામનગર મહાનગરપાલિકાની એસ્ટેટ શાખાની ટીમ તથા ગુજરાત હાઉસિંગ બોર્ડના અધિકારીઓ આ જર્જરીત મકાનો તોડી પાડવા માટે પહોંચ્યા હતાં. ઉલ્લેખનિય છે કે, ગતવર્ષે આ વિસ્તારમાં જર્જરીત બિલ્ડીંગ પડતાં એક જ પરિવારના ત્રણ લોકોના મોત નિપજ્યા હતાં. ત્યારે આ અંગે અનેક વખત નોટીસો પાઠવવામાં આવી હોવા છતાં રહેવાસીઓ મકાન ખાલી કરતાં ન હોય તેમજ ચોમાસાની સિઝન નજીક આવી રહી હોય, તેને ધ્યાને ગઇકાલે જામનગર મહાનગરપાલિકાની એસ્ટેટ શાખા અને હાઉસીંગ બોર્ડના અધિકારીઓની ટીમ પોલીસ બંદોબસ્ત સાથે આ વિસ્તારમાં પહોંચી હતી અને જર્જરીત મકાનો ખાલી કરી અન્ય સુરક્ષિત જગ્યાએ સ્થળાંતર કરવા સૂચના આપી હતી.
અનેક વખત સૂચના અને નોટીસ આપવા છતાં રહેવાસીઓ મકાન ખાલી કરતાં ન હોય, રહેવાસીઓની સુરક્ષાને ધ્યાને લઇ આજે જામ્યુકો તથા હાઉસિંગ બોર્ડના અધિકારીઓ સહિતની ટીમ સાધના કોલોની ખાતે પહોંચી હતી અને પોલીસ બંદોબસ્ત વચ્ચે આ જર્જરીત મકાનો તોડી પાડવા કાર્યવાહી હાથ ધરી હતી. આ કામગીરીને લઇ રહેવાસીઓ દ્વારા વિરોધ કરવામાં આવ્યો હતો અને વૈકલ્પિક વ્યવસ્થા આપવા માગણી કરવામાં આવી હતી. આમ છતાં અનેક વખત નોટીસો આપી હોય છતાં રહેવાસીઓ દ્વારા કોઇ પગલાં ન લેતાં તંત્ર દ્વારા મકાનો ખાલી કરાવી ડિમોલીશન હાથ ધર્યું હતું. આ દરમિયાન વિરોધ કરી રહેલ રહેવાસી યુવાનને ચક્કર આવી પડી જતાં 108 એમ્બ્યુલન્સને તાકિદે બોલાવવામાં આવી હતી અને સારવાર માટે કામગીરી હાથ ધરી હતી.
