બેંક એકાઉન્ટ અન્ય વ્યક્તિને ભાડે આપી અને યેનકેન પ્રકારે લાભ મેળવી, ફ્રોડને આડકતરું ઉત્તેજન આપવા તેમજ સાઈબર ગઠિયાઓને એક પ્રકારે સહાયભૂત થવાના પ્રકરણમાં આવા આસામીઓ સામે પોલીસે કડક કાર્યવાહી હાથ ધરી છે. જેમાં દેવભૂમિ દ્વારકા જિલ્લા સાયબર ક્રાઇમ પોલીસે મ્યુલ હન્ટ અંતર્ગત ચાર વ્યક્તિઓને ઝડપી લઇ કુલ રૂપિયા 66.16 લાખના બેંક ટ્રાન્ઝેક્શન અંગે કાર્યવાહી કરાઇ છે.
આ અંગેની વિગત મુજબ રાજકોટ રેન્જ આઈ.જી. નિર્લિપ્ત રાય તેમજ દેવભૂમિ દ્વારકા જિલ્લા પોલીસવડા જયરાજસિંહ વાળાની સૂચના મુજબ જિલ્લામાં બનતા સાયબર ક્રાઇમ અંગેના ગુનાઓ સામે કડક કાર્યવાહી હાથ ધરવામાં આવી છે. જેમાં ડીવાયએસપી મીત રુદલાલના માર્ગદર્શન હેઠળ જિલ્લા સાયબર ક્રાઇમ પોલીસ મથકના પી.આઈ. એચ.જી. રાઠોડ તેમજ તેમની ટીમ દ્વારા ખંભાળિયાના ગાયત્રીનગર વિસ્તારમાં રહેતા યોગીરાજસિંહ દશરથસિંહ ચુડાસમા, ભાણવડ તાલુકાના માનપર ગામના અરશી મારખીભાઈ બેરા, ભાણવડના કુંભારપાડો વિસ્તારમાં રહેતા શિવમ ્અરવિંદભાઈ વિસાવાડિયા અને ભાવનગર જિલ્લાના તળાજા ખાતે રહેતા સિદ્ધરાજસિંહ વીરેન્દ્રસિંહ ગોહિલ નામના ચાર શખ્સોને ઝડપી લઇ ગેરકાયદેસર બેંક ટ્રાન્ઝેક્શન સંદર્ભે કૌભાંડ ખુલ્યું હતું.
ખંભાળિયાની બેન્ક ઓફ ઈન્ડિયા તથા ભાણવડની સ્ટેટ બેન્ક ઓફ ઇન્ડિયાના બેન્ક એકાઉન્ટના ધારકો તેમજ મળતીયાઓ વિરુદ્ધ જિલ્લા સાયબર ક્રાઇમ પોલીસ મથકમાં નોંધાયેલા ગુના સંદર્ભે પોલીસ તપાસમાં ચારેય શખ્સો દ્વારા પોતાના બેંક એકાઉન્ટ ભાડે આપી અને રાતોરાત પૈસા કમાવાની લાલચમાં સાયબર ગુનાઓને આડકતરું ઉત્તેજન આપ્યું હતું. જેમાં આવા બેન્ક એકાઉન્ટમાંથી સાયબર ફ્રોડના કુલ રૂપિયા 66 લાખ 16 હજારની આપ-લે થવા પામી હતી. આ રીતે મ્યુલ એકાઉન્ટ હોલ્ડર તથા આવા એકાઉન્ટને સાયબર ક્રાઈમના ગુનામાં વપરાશ લેતા પોલીસે ઝડપી લીધા છે.
સાયબર પોલીસે આ પ્રકરણમાં સંડોવાયેલા અન્ય મુખ્ય આરોપીઓની શોધખોળ હાથ ધરી છે. આ સમગ્ર કાર્યવાહી સાયબર ક્રાઇમ પોલીસ મથકના પીઆઈ એચ. જી. રાઠોડ, પીએસઆઈ બી. કે. કડછા તથા સ્ટાફના ધરણાંતભાઈ બંધીયા, ભરતભાઈ ચાવડા, હેભાભાઈ ચાવડા સાજણભાઈ સુવા, ક્રિપાલસિંહ ચૌહાણ તથા સાયબર ક્રાઈમની ટીમ દ્વારા કરવામાં આવી હતી.
જિલ્લા પોલીસ વડાની જાહેર જનતા જોગ અપીલ
દેવભૂમિ દ્વારકા જિલ્લામાં કોઈ પણ વ્યક્તિએ પોતાના કે તેમની પેઢીના નામે ખોલાવવામાં આવેલા બેન્ક એકાઉન્ટ મારફતે ટૂંક સમયમાં વધુ પૈસા કમાવવાની લાલચથી બીજી વ્યક્તિઓને પોતાનું એકાઉન્ટ યુઝ કરવા માટે આપવું તે ગુનો બને છે. આવી રીતે કોઈપણ વ્યક્તિ બેન્ક એકાઉન્ટની માંગણી કરે તો સતર્ક રહેવું. જે બદલ જે તે એકાઉન્ટ ભાડે આપનાર વિરૂદ્ધ પણ કાયદેસરની કાર્યવાહી થઈ શકે છે તેમ જિલ્લા પોલીસવડા જયરાજસિંહ વાળાની એક યાદીમાં જણાવાયું છે.
