જામનગર જિલ્લામાં ચાલુ વર્ષે મગફળી પાકની સરકારી ખરીદી અભૂતપૂર્વ ઉત્સાહ સાથે ચાલી રહી છે, જે ખેડૂતોના સક્રિય પ્રતિભાવ અને ટેકાના ભાવ પ્રત્યેના વિશ્વાસને દર્શાવે છે. જિલ્લાના કુલ 1,02,970 નોંધાયેલા ખેડૂતોમાંથી અત્યાર સુધીમાં 29,816 ખેડૂતોને મેસેજ મોકલાયા છે અને તેમાંથી 26,731 ખેડૂતોએ ખરીદી સેન્ટરો પર પાકનું વેચાણ કરીને પ્રક્રિયાને ઝડપી ગતિ આપી છે. ખુલ્લા બજારમાં પૂરતા ભાવ ન મળતા હોવાને કારણે મોટાભાગના ખેડૂતો ટેકાના ભાવનો લાભ લઈ સરકારની ખરીદી તરફ વળ્યા છે, જેના પરિણામે આ વર્ષે ખરીદી રેકોર્ડ સ્તરે પહોંચી છે.
જામનગર જિલ્લામાં હાલમાં કુલ 14 ખરીદી સેન્ટરો પર ટેકાના ભાવે મગફળીની ખરીદી ચાલુ છે. તંત્ર દ્વારા દરેક સેન્ટર પર સુવ્યવસ્થિત આયોજન કરવામાં આવ્યું છે, જેનાથી ખેડૂતોમાં સંતોષની લાગણી જોવા મળી રહી છે. ખેડૂતોના જણાવ્યા મુજબ, તોલ-માપ, ટોકન સિસ્ટમ, પાણી-છાંયો, પાર્કિંગ જેવી તમામ મૂળભૂત સુવિધાઓ ઉપલબ્ધ છે. તેમજ ગ્રેડિંગ અને ગુણવત્તા ચકાસણી પણ પારદર્શક રીતે કરવામાં આવી રહી છે. આ ઉત્તમ વ્યવસ્થાને કારણે ખેડૂતો દ્વારા તંત્રની કામગીરી પ્રત્યે સંતોષ વ્યક્ત કરવામાં આવી રહ્યો છે અને ખરીદી પ્રક્રિયા સુચારુ બની છે.
ખેડૂતોના સક્રિય પ્રતિભાવને કારણે મગફળીની ખરીદીના આંકડાઓ પ્રોત્સાહક રહ્યા છે. અત્યાર સુધીમાં જિલ્લામાં કુલ 6,37,902.98 ક્વિન્ટલ મગફળીની ખરીદી થઈ ચૂકી છે. આ ખરીદાયેલ જથ્થા માટે સરકાર દ્વારા ₹46,330.9 લાખ જેટલી માતબર રકમ ચૂકવવા પાત્ર બનેલી છે. તંત્ર દ્વારા ચુકવણીની પ્રક્રિયા ત્વરિત રીતે ચલાવવામાં આવી રહી છે, જેથી ખેડૂતોને તેમનો પાક વેચ્યા બાદ સમયસર પૈસા મળી રહે અને તેમને આર્થિક ટેકો પ્રાપ્ત થાય.
આ વર્ષે મગફળી ખરીદીમાં ખેડૂતોની ભીડ અને વધેલા પ્રતિસાદને ધ્યાનમાં રાખીને તંત્ર સતત ખરીદી સેન્ટરોનું મોનીટરીંગ કરી રહ્યું છે. ખરીદીની પ્રક્રિયા સરળ અને ઝડપી બને તે દિશામાં તમામ વિભાગો સમન્વયથી કામ કરી રહ્યા છે. ખેડૂતોને કોઈ મુશ્કેલી ન પડે તે માટે વધારાની વ્યવસ્થા અને સ્ટાફ પણ નિયુક્ત કરવામાં આવ્યા છે, જેનાથી સમગ્ર પ્રક્રિયા વ્યવસ્થિત રીતે આગળ વધી રહી છે. જામનગર જિલ્લામાં ચાલી રહેલી આ મગફળી ખરીદી આ વર્ષે રેકોર્ડ સ્તરે ચાલી રહી છે, જે ખેડૂતોને ટેકાના ભાવથી ખુશ કરી રહી છે અને તંત્રની સુવ્યવસ્થા પણ સંતોષકારક પુરવાર થઈ છે.
