વિશ્વની અગ્રણી ઈ-કાર કંપની ટેસ્લાના સીઈઓ ઈલોન મસ્કને અનેક દેશોની જીડીપી કરતાં વધુ વાર્ષિક સેલેરી પેકેજ મળ્યું છે. ગઈકાલે છ નવેમ્બર, 2025ના રોજ યોજાયેલી ટેસ્લાની એજીએમમાં શેરહોલ્ડર્સે કંપનીના સીઈઓ મસ્કને 1 લાખ કરોડ ડોલર (રૂ. 8.36 લાખ કરોડ)નું વાર્ષિક સેલેરી પેકેજ આપવાના પ્રસ્તાવ પર મંજૂરી આપી હતી. કંપનીના ઓસ્ટિન કારખાનામાં આ મામલે થયેલા મતદાનમાં બહુમતી મળી હતી. આ સાથે આ સેલેરી પેકેજ કોઈપણ કોર્પોરેટ લીડરને અત્યારસુધીમાં આપવામાં આવેલાં પેકેજની તુલનાએ સૌથી વધુ છે.
ઈલોન મસ્કનું આ વાર્ષિક સેલેરી પેકેજ યુરોપના અનેક દેશોની જીડીપી કરતાં વધુ છે. આઈએમએફ અનુસાર, 1 લાખ કરોડ ડોલર કે તેથી ઓછો જીડીપી ધરાવતા દેશોમાં નેધરલેન્ડ, પોલેન્ડ, સ્વિટ્ઝરલેન્ડ, બેલ્જિયમ, સ્વિડન સહિતના દેશો સામેલ છે. નેધરલેન્ડનો જીડીપી 1.27 લાખ કરોડ ડોલર, પોલેન્ડનો 980 અબજ ડોલર, સ્વિટ્ઝરલેન્ડનો જીડીપી 947 અબજ ડોલર, બેલ્જિયમનો જીડીપી 685 અબજ ડોલર, સ્વિડન 620 અબજ ડોલર, આર્યલેન્ડ 599 અબજ ડોલર, ઓસ્ટ્રિયા 534 અબજ ડોલર, નોર્વે 504 અબજ ડોલર અને ડેનમાર્ક 450 અબજ ડોલર રહ્યો હતો.
એક સક્રિય સંગઠન “ટેસ્લા ટેકડાઉન” એ આ નિર્ણયની આકરી ટીકા કરી હતી. કંપનીના ઓટો સેલ્સમાં તાજેતરના નોંધાયેલા ઘટાડા તરફ ધ્યાન દોરતાં તેઓએ કહ્યું, નિષ્ફળતા માટે ઈલોન મસ્કને એક લાખ કરોડ ડોલર (આશરે રૂ. 8,36,00,00 કરોડ) આપવામાં આવ્યા છે. વેચાણ સતત ઘટી રહ્યા છે, સલામતીના જોખમો વધી રહ્યા છે, અને તેમની રાજકીય વિચારધારા ગ્રાહકોને દૂર કરી રહી છે. આ નેતૃત્વ નથી, તે વિશ્વની સૌથી મોંઘી પાર્ટનરશીપ ટ્રોફી છે. ઉલ્લેખનિય છે, છેલ્લા કેટલાક સમયથી ટેસ્લાના વિવિધ મોડલ પર સુરક્ષાના માપદંડો પર સવાલો ઉઠ્યા છે. તેમજ તેની ઓટો સિસ્ટમમાં પણ ખામી હોવાની અનેક ફરિયાદો નોંધાઈ છે.
