ચંડીગઢમાં યોજાયેલી જીએસટી કાઉન્સિલની બેઠકમાં સંખ્યાબંધ ચીજવસ્તુઓના જીએસટી સ્લેબમાં ફેરફાર કરવામાં આવ્યો છે. ખાસ કરીને બ્રાન્ડ ખાદ્ય પદાર્થો પર 5 ટકા જીએસટી લાદવામાં આવ્યો છે.
મીટ, ફિશ, દહીં, પનીર અને મઘ, ડ્રાઇડ મખના, ઘઉં જેવી પ્રિ-પેક્ડ અને લેબલ્ડ ફુડ આઇટમ જેવી ફૂડ આઇટમ પર હવે 5 ટકા જીએસટી લાગુ પડશે. આ ઉપરાંત ચેક જારી કરવા માટે બેન્ક દ્વારા લેવામાં આવતા ચાર્જ પર પણ 18 ટકા જીએસટી લાગુ પડશે. ટેક્સ માફી પાછા ખેંચી લેવાની રાજ્યોના પ્રધાનોના ગ્રૂપની મોટાભાગની ભલામણોને જીએસટી કાઉન્સિલે સ્વીકારી હોવાથી આ તમામ ફૂડ આઇટમ મોંઘી બનશે. નકશા અને ચાર્ટ પર પણ 12 ટકા ટેક્સ લાગુ પડશે. જોકે પેકિંગ, લેબલ કે બ્રાન્ડ વગરની આઇટમ પર જીએસટી લાગુ પડશે નહીં. કેન્દ્રીય નાણાપ્રધાન નિર્મલા સિતારમણના વડપણ હેઠળની કાઉન્સિલની બેઠકમાં જીએસટી રજિસ્ટ્રર્ડ બિઝનેસ માટે નિયમ પાલનની સંખ્યાબંધ પ્રોસિજરને બહાલી આપવામાં આવી હતી. જૂન 2022 પછી પણ રાજ્યોને વળતર આપવાના તથા કેસિનો, ઓનલાઇન ગેમિંગ અને હોર્સ રેસિંગ પર 28 ટકા જીએસટી લાદવાના મહત્ત્વના મુદ્દાની બુધવારે ચર્ચાવિચારણા થશે. કર્ણાટકના મુખ્યપ્રધાન બસવરાજ એસ બોમ્બાઇના વડપણ હેઠળ રાજ્યના નાણાપ્રધાનોના ગ્રૂપના વચગાળાના અહેવાલને કાઉન્સિલે સ્વીકાર્યો છે.
આ અહેવાલમાં ઇન્વેર્ટેડ ડ્યુટી સ્ટ્રક્ચરમાં સુધારો તથા કેટલીક આઇટમ પરની ટેક્સ માફીને દૂર કરવાની ભલામણ કરાઈ છે. પ્રધાનોના ગ્રૂપે સંખ્યાબંધ સર્વિસિસ માટે જીએસટી માફીને પાછી ખેંચી લેવાનું સૂચન કર્યું છે. હાલમાં દૈનિક 1,000થી ઓછા ભાડાના હોટેલ એકોમોડેશન પર જીએસટી લાગુ પડતો નથી, જેના પર હવે 12 ટકા ટેક્સ લાગુ પડશે.
પ્રધાનોના ગ્રૂપે હોસ્પિટલ રૂમનો ચાર્જ દૈનિક 5,000થી વધુ હોય તેવા કિસ્સામાં રૂમ ભાડા પર 5 ટકા જીએસટીની ભલામણ કરી છે. જોકે તેમાં આઇસીયુનો સમાવેશ થતો નથી. પ્રધાનોના ગ્રૂપે પોસ્ટકાર્ડ અને ઇનલેન્ડ લેટર્સ સિવાયની પોસ્ટ ઓફિસની તમામ સેવાઓ પર ટેક્સ લાદવાની ભલામણ કરી છે. આ ઉપરાંત ચેક (લૂઝ કે બુકના સ્વરૂપ)માં 18 ટકા ટેક્સ લાદવાની ભલામણ કરી છે. ગોલ્ડ, જ્વેલરી અને કિંમતી સ્ટોનના આંતરરાષ્ટ્રીય હેરફેર માટેના ઇ-વે બિલના સંદર્ભમાં કાઉન્સિલે ભલામણ કરી છે કે ઇલેક્ટ્રોનિક બિલને ફરજિયાત બનાવવાની મર્યાદા નક્કી કરવા અંગે રાજ્યો નિર્ણય કરશે.
પ્લાસ્ટિક સ્ટિક સાથેના ઇયર બડ્સ, ફુગ્ગા માટેની પ્લાસ્ટિક સ્ટિક, પ્લાસ્ટિકના ધ્વજ, કેન્ડી સ્ટિક, આઇસક્રીમ સ્ટિક, ડેકોરેશન માટેના થર્મોકોલ, પ્લાસ્ટિક પ્લેટ્સ, પ્લાસ્ટિક કપ્સ, પ્લાસ્ટિક ગ્લાસ, પ્લાસ્ટિક કટલરી (કાંટા ચમચી, ચમચી, ચપ્પા, સ્ટ્રો, ટ્રે, મિઠાઇના બોક્સના પેકિંગમાં વપરાતી પેકિંગ ફિલ્મ્સ, આમંત્રણ પત્રિકા, સિગરેટના પેકેટ, 100 માઇક્રોન્સથી ઓછી જાડાઇના પ્લાસ્ટિક કે પીવીસી બેનર્સ કેન્દ્રીય પર્યાવરણ મંત્રી ભુપેન્દર યાદવે મંગળવારે જણાવ્યું હતું કે, સરકારે ઉદ્યોગ જગત અને જનતાને સિંગલ યુઝ પ્લાસ્ટિકની ચીજો પર પ્રતિબંધ સામે તૈયારી કરવા પૂરતો સમય આપ્યો છે. સરકારને આશા છે કે, પહેલી જુલાઇથી અમલી બનનારા આ નિર્ણયમાં બધા સહયોગ આપશે. પર્યાવરણ મંત્રાલયના અધિકારીઓએ જણાવ્યું હતું કે, 19 સિંગલ યુઝ પ્લાસ્ટિકની ચીજો પર પ્રતિબંધ મૂકવાનું નોટિફિકેશન એન્વાયર્મેન્ટ પ્રોટેક્શન એક્ટ (ઇપીએ) હેઠળ જારી કરાયું છે. તેનું ઉલ્લંઘન કરનાર સામે કડક કાર્યવાહી થશે. જેમાં દંડ અથવા જેલ અથવા બંનેનો સમાવેશ થાય છે.
