જામનગર શહેર અને જિલ્લામાં પોલીસ અધિક્ષક દ્વારા વ્યાજખોરો સામે શરૂ કરાયેલી ઝુંબેશમાં બહોળો પ્રતિસાદ સાંપડયો છે. એક પછી એક વ્યાજખોરો વિરૂધ્ધ ફરિયાદો આવતી જાય છે. જામનગરની સાથે સાથે સમગ્ર રાજ્યમાં આ ઝુંબેશને કારણે વ્યાજખોરો ભૂગર્ભમાં જતાં રહ્યા છે. પ્રજા સમક્ષ આવેલી પોલીસને વ્યાજના ચુંગલમાં ફસાયેલા લોકો દ્વારા વ્યાપક ફરિયાદો મળી રહી છે. જામનગર શહેરમાં જ એક જ દિવસમાં ચાર ફરિયાદ નોંધાઈ છે. જેના આધારે પોલીસે વ્યાજખોરીનું દૂષણ ડામવા તપાસના ચક્રો ગતિમાન કરી દીધા છે.
રાજ્યના ગૃહમંત્રી હર્ષ સંઘવી દ્વારા ગુજરાતમાંથી વ્યાજખોરીનું દૂષણ ડામવા માટે ઝુંબેશ ચલાવવાની આપેલી સૂચનાના આધારે રાજ્યભરમાં પોલીસ એકશનમાં આવી ગઈ છે અને જિલ્લા તથા તાલુકા મથકે જનસભાનું આયોજન કરી વ્યાજખોરોના ચુંગલમાં ફસાયેલા લોકોને બહાર આવવા અપીલ કરવામાં આવે છે. આ ઝુંબેશના પ્રારંભથી જ પોલીસને મોટી સફળતા મળી છે. જેમાં રાજ્યભરમાં રાક્ષસી વ્યાજ વસૂલ કરતાં વ્યાજખોરો વિરુધ્ધ પોલીસ ફરિયાદનો ધોધ છૂટયો છે. રાજ્યની સાથે જામનગર પોલીસ અધિક્ષક પ્રેમસુખ ડેલુ દ્વારા શહેર અને જિલ્લામાં વ્યાજખોરીનું દૂષણ ડામવા માટે જુદા-જુદાં વિસ્તારોમાં જનસભાનું આયોજન કરવામાં આવ્યું છે. ઉપરાંત શહેરના વિસ્તારોમાં રીક્ષા ફેરવી પ્રચાર-પ્રસાર કરી વ્યાજખોરો સામેની જંગમાં લોકોને બેખોફ બની ફરિયાદ કરવા આગળ આવવા અપીલ કરવામાં આવી રહી છે. પોલીસની આ ઝુંબેશમાં મંગળવારે એક જ દિવસમાં ચાર પોલીસ ફરિયાદ નોંધાઈ છે. જેમાં જામનગરના દિવ્યમ પાર્ક વિસ્તારમાં શિવપ્લાઝામાં રહેતાં ઘનશ્યામભાઈ મોહનભાઈ પટેલ લાયસન્સ વગર નાણાં ધિરધારનો વ્યવસાય કરી વર્ષ 2016 થી 2023 સુધીના સાત વર્ષના સમય દરમિયાન વાણંદ કામ કરતા બાબુભાઈ ટપુભાઈ રાઠોડ નામના પ્રૌઢે નોંધાવેલી ફરિયાદની વિગત મુજબ, ઘનશ્યામભાઈએ 3.5% થી 20% જેટલા ઉંચા વ્યાજે ચાર લાખની રકમ આપી હતી. જેના બદલામાં એડવાન્સ વ્યાજના રૂા.50,000 તથા રૂા.2,50,000 ની એક દુકાન તેમજ પત્નીના નામે મકાન લોન રૂા.18,00,000 ની અને સબસિડીના રૂા.2,71,000 તથા મુદ્લના વ્યાજપેટે રૂા.3,80,000 મળી કુલ રૂા.27,51,000 ની રકમ પડાવી લીધી હતી.
તેમજ વ્યાજખોર ઘનશ્યામભાઈ દ્વારા સંજય શાંતિલાલ પાસેથી વ્યાજના રૂા.7500 અને રૂા.6,00,000 પડાવવા માટે સુરેન્દ્રનગરની કોર્ટમાં ચેક રિટર્નનો કેસ કર્યો હતો. ઉપરાંત કેશુભાઈ ભનુભાઈ રાઠોડના પુત્ર ચિરાગે રૂા.3,00,000 રૂપિયા વ્યાજે લીધા હતાં તેના બદલામાં રૂા.2,00,000 રોકડા અને રૂા.16,00,000 ની કિંમતનું મકાન તથા રૂા.5,80,000 ની કિંમતની દુકાન તેમજ રૂા.8,00,000 નું મકાન મળી કુલ રૂા.31,80,000 પડાવી લીધા હતાં તથા કરશનભાઈ વારોતરિયા પાસેથી ઘનશ્યામ વ્યાજખોરે રૂા.45,00,000 ના બદલામાં વ્યાજના રૂા.25,00,000 અને રૂા.15,00,000 ની કિંમતની ત્રણ દુકાનો તેમજ જુદી જુદી બેંકના સાત થી આઠ ચેક પડાવી લીધા હતાં. આમ ઘનશ્યામ વ્યાજખોર દ્વારા ચાર વ્યક્તિઓ પાસેથી વ્યાજની વસૂલાત બળજબરીથી બેંકના કોરા ચેક લખાવી મકાન-દુકાનો પચાવી પાડી છેતરપિંડી અને વિશ્ર્વાસઘાત કરી માત્ર ચાર વ્યક્તિઓ પાસેથી બળબજરી દ્વારા કુલ રૂા.1,05,31,000 રકમ અને મિલકત પચાવી પાડી હોવાની ફરિયાદના આધારે પીએસઆઈ વી.એ. પરમાર તથા સ્ટાફે તપાસ આરંભી હતી.
બીજા બનાવની વિગત મુજબ, મોહનનગરમાં રહેતાં કેયુરભાઈએ નોંધાવેલી ફરિયાદની વિગત મુજબ, કેયુરે પટેલકોલોની શેરી નં.6 રહેતાં નિલેશ દિક્ષીત પાસેથી આઠ માસ પહેલાં રોજના 200 અને મહિને 6000ના વ્યાજે રૂા. 20,000 ની રકમ લીધી હતી. આ રકમનું 45,000 જેટલું વ્યાજ ચૂકવી દીધું હોવા છતાં વ્યાજખોર નિલેશ દિક્ષીત કેયુરની આર્થિક પરિસ્થિતિ સારી ન હોવા છતાં વ્યાજ સાથે વધુ બે લાખની માંગણી કરી રૂિ5યા આપવા દબાણ કરતો હતો. તેમજ વિમલ ફલ પાસેથી 10% વ્યાજે રૂા.3,50,000 ની રકમ વ્યાજે લીધી હતી. જેનું રૂા.7,50,000 વ્યાજ ચૂકવી દીધું હોવા છતાં વિમલ કેયુર પાસેથી વધુ રૂા.18,00,000 ની રકમ બળજબરીથી પડાવવા માટે પઠાણી ઉઘરાણી કરી જામીનગીરી માટે કેયુરના મકાનના દસ્તાવેજની ઓરીજનલ ફાઈલ તેમજ બેંકના ચેક પડાવી લીધા હતાં અને અપશબ્દો આપી ધમકી આપી હોવાની ફરિયાદ નોંધાઈ હતી. આ બનાવ અંગે હેકો આર.ડી. ગાંભવા તથા સ્ટાફે તપાસ આરંભી હતી.
ત્રીજી ફરિયાદ પટેલ કોલોની વિસ્તારમાં રહેતા રાકેશ સોમૈયા નામના યુવાને તેની પુત્રીની સારવાર માટે રામેશ્ર્વરનગરમાં રહેતાં હેમતસિંહ જાડેજા પાસેથી રૂા.10,000 ની રકમ 30% ઉંચા વ્યાજે લીધી હતી. આ રકમના વ્યાજપેટે કટકે કટકે રૂા.21,000 ચૂકવી દીધા હોવા છતાં વ્યાજખોર દ્વારા બળજબરી કરી બેંકના કોરા ચેકમાં સહિ કરાવી અને વધારાના રૂા.45,000 ની ઉઘરાણી કરી ફોનમાં તથા રૂબરૂમાં અપશબ્દો કહી ઢીકાપાટુનો માર મારી પતાવી દેવાની ધમકી આપી ચેક રિટર્નનો ખોટો કેસ કરવાની ધમકી આપ્યાના બનાવમાં પીએસઆઈ બી.બી.કોડિયાતરે ગુનો નોંધી તપાસ આરંભી હતી.
ચોથી ફરિયાદ, જામનગરના બેડીમાં રહેતાં મામદભાઈ ચૌહાણે બેડેશ્ર્વરમાં રહેતાં રોશનબેન ઈબ્રાહિમ મંદ્રા પાસેથી રૂા.10,000 ની રકમ 10% ઉંચાવ્યાજે લીધી હતી. આ રકમના 18 હપ્તા ચૂકવ્યા બાદ વ્યાજ ચૂકવી ન શકતા વ્યાજખોરે બળજબરીથી રકમ કઢાવવા માટે સિકયોરિટી પેટે આપેલા સહિ વાળા ચેક વટાવવા માટે વસીમ કરીમ સંધીને આપી દીધા હતાં. જેથી તેણે આ ચેકમાં ત્રણ લાખની રકમ ભરી ચેક રિટર્ન કર્યાનો ગુનો મામદભાઈ વિરૂધ્ધ નોંધાવ્યો હતો. આ બનાવમાં પીએસઆઈ એ.વી.વણકર તથા સ્ટાફે મામદભાઈની ફરિયાદના આધારે રોશનબેન મંદ્રા અને ચેકનો દુરઉપયોગ કરનાર વસીમ સંધી વિરૂધ્ધ ગુનો નોંધી તપાસ આરંભી હતી.
