જામનગર નજીક ખીજડિયા પક્ષી અભ્યારણ પાસે ગઇકાલે એક ટ્રેક્ટરનું વ્હીલ નીકળી જતાં ટ્રેક્ટર પલટી મારી જતા ટ્રેકટર ના ચાલકનું ટ્રોલીની નીચે દબાઈ જવાથી ઘટનાસ્થળે જ કરૂણ મૃત્યુ નિપજ્યું હતું. જ્યારે ટ્રેકટરમાં બેઠેલા અન્ય ૩ વ્યક્તિને નાની-મોટી ઇજા થઇ હતી.
આ અંગે ની વિગત મુજબ મૂળ બિહારનો વતની અને હાલ ખીજડીયા ગામ માં રહેતો અને ટ્રેક્ટર ચલાવતો નંદકિશોર અયોધ્યા યાદવ નામનો 31 વર્ષનો યુવાન ગઈકાલે પોતાનું ટ્રેક્ટર લઈને તેમાં અન્ય 3 વ્યક્તિને બેસાડીને ખીજડીયા પક્ષી અભ્યારણ પાસેથી પસાર થઈ રહ્યો હતો, જે દરમિયાન ટ્રેક્ટરનું એક તરફ નું વ્હીલ નીકળી જતાં ટ્રેક્ટર પલટી મારી જતાં ગમખ્વાર અકસ્માત સર્જાયો હતો.
આ અકસ્માતમાં ટ્રેકટર ની ટ્રોલી નીચે દબાઈ જવાથી ટ્રેકટરચાલક નંદકિશોર યાદવનું ગંભીર ઇજા થવાથી ઘટના સ્થળે જ કરૂણ મૃત્યુ નિપજયુ હતુ. આ ઉપરાંત ટ્રેક્ટરની ટ્રોલી માં બેઠેલા ત્રણ યુવાનોને પણ નાની-મોટી ઇજા થઇ હતી.
જેમાં રણજિતરામ ને ગંભીર ઈજા થઈ હોવાથી વધુ સારવાર માટે અમદાવાદની હોસ્પિટલમાં ખસેડાયો છે, જ્યારે ગોપી લાલ ભગત અને ધર્મેન્દ્ર રામભજોસિંઘ ને પ્રાથમિક સારવાર અપાઇ છે. આ અકસ્માત ના બનાવની જાણ થતાં પંચકોશી બી. ડિવિઝન નો પોલીસ કાફલો ઘટનાસ્થળે દોડી ગયો હતો, અને મૃતદેહનો કબ્જો સંભાળી પોસ્ટમોર્ટમ સહિતની કાર્યવાહી હાથ ધરી હતી.
