જૈનોના પર્યૂષણ પર્વમાં ત્રીજા દિવસે કલ્પસૂત્ર રાત્રી જાગરણ (રાત્રીજગો) ઉજવણી અંતર્ગત પ્રથમ વખત શહેરના ચાંદીબજારમાં શેઠજી દેરાસરના પટાંગણમાં કલ્પસૂત્ર રાત્રી જાગરણની ઉજવણી કરવામાં આવી હતી. આ ઉ5રાંત શહેરના પટેલ કોલોનીમાં શંખેશ્વર પાર્શ્વનાથ દેરાસર અંતર્ગત પણ બહેનો દ્વારા રાત્રી જાગરણની ઉજવણી કરવામાં આવી હતી.
ચાંદીબજારમાં શેઠજી દેરાસરમાં બિરાજમાન મુળનાયક આદેશ્વર ભગવાનની સામે આવેલ પટાંગણમાં રાત્રે 9 વાગ્યાથી 10:45 સુધી વિક્રમભાઇ મહેતા પાર્ટી દ્વારા ભાવના ભણાવવામાં આવી હતી. ત્યારબાદ 11 વાગ્યાથી રાત્રીના 12:30 વાગ્યા સુધી કલ્પસૂત્ર રાત્રી જાગરણની મહાવીર સંગીત મંડળના ભાઇઓ-બાળકો દ્વારા ઉજવણી કરાઇ હતી. જેમાં શહેરના જૈન ભાઇઓએ મોટી સંખ્યામાં ઉપસ્થિત રહી ભક્તિ કરી હતી. જે લોકો તપશ્ચર્યા કરી રહ્યા છે. તે લોકો પણ આ રાત્રી જાગરણમાં ઉપસ્થિત રહી તપશ્ચર્યા કરી ભક્તિનો લાભ લીધો હતો. આ ભક્તિમાં નાના-મોટા બધા જ લોકો ઝાંઝ-પખાલ વગાડી ઝુમી ઉઠયા હતાં. આવતીકાલે પર્યૂષણ દરમિયાન પાંચમા દિવસે મહાવીર જયંતિની ઉજવણી કરવામાં આવે છે. જેમાં ભગવાનના માતા ત્રિશલાને આવેલા 14 સ્વપ્નની ઉછામણી શહેરમાં આવેલા ઉપાશ્રયો-પાઠશાળામાં કરવામાં આવશે.
