કલ્યાણપુર નજીક એસ.ટી. બસ અને મોટરકાર વચ્ચે ટક્કર

જુનાગઢ જિલ્લાના માંગરોળ તાલુકામાં રહેતા મુકેશભાઈ માલદેભાઈ પરમાર નામના 42 વર્ષના યુવાન તેમની જીજે-03-એમઈ-2067 નંબરની મોટરકાર લઈને કલ્યાણપુરથી આશરે 16 કિલોમીટર દૂર ભાટિયા ગામથી ખંભાળિયા તરફ જતા રસ્તેથી પસાર થઈ રહ્યા હતા. ત્યારે આ માર્ગ પર આવી રહેલી જી.જે. 18 ઝેડ 8799 નંબરની એસ.ટી. બસના ચાલકે મોટરકાર સાથે અકસ્માત સર્જ્યો હતો.

આ અકસ્માતમાં મોટરકારમાં જઈ રહેલા દિવ્યાબેન મુકેશભાઈ પરમાર (ઉ.વ. 22) ને માથામાં હેમરેજ થવા ઉપરાંત કારચાલક મુકેશભાઈ પરમારને પણ શરીરના જુદા જુદા ભાગોમાં ઈજાઓ થવા પામી હોવાનું જાહેર થયું છે. આ સમગ્ર બનાવ અંગે કલ્યાણપુર પોલીસે એસ.ટી. બસના ચાલક સામે આઈપીસી કલમ 279, 337, 338 તથા એમ.વી. એક્ટની કલમ હેઠળ ગુનો નોંધી, ધોરણસર કાર્યવાહી હાથ ધરી છે.