યુક્રેનના સુમી શહેરમાં ફસાયેલા ભારતીય છાત્રોને સલામત બહાર કાઢવા માટે પ્રધાનમંત્રી નરેન્દ્ર મોદી સક્રિય બન્યા છે. તેઓ ભિષણ યુધ્ધની પરિસ્થિતિ વચ્ચે આજે બપોરે ુંયુક્રેનના રાષ્ટ્રપતિ ઝેલેન્સ્કી સાથે 35 મિનિટ વાતચીત કરી હતી.
ત્યારબાદ તેઓ રશિયાના રાષ્ટ્રપતિ પુતિન સાથે વાત કરશે. આ ઉપરાંત યુધ્ધની પરિસ્થિતિ અંગે પણ બન્ને નેતાઓ સાથે ચર્ચા કરશે. યુધ્ધનું શાંતિપૂર્ણ સમાધાન શોધવા માટે બન્ને રાષ્ટ્રનેતાઓને અપીલ કરે તેવું પણ માનવામાં આવી રહ્યું છે. આ અગાઉ યુક્રેનમાં ફસાયેલા ભારતીય છાત્રોને લઇને વડાપ્રધાન મોદી પુતિન અને જેલેન્સી સાથે વાત કરી ચૂકયા છે. યુક્રેનના કિવ અને ખારકિવ સહિતના મોટાભાગના શહેરોમાંથી ભારતીય છાત્રોને બહાર કાઢી લેવામાં આવ્યા છે. પરંતુ સુમીમાં હજૂ પણ સેંકડો ભારતીય છાત્રો ફસાયેલા છે. જેમને યુધ્ધક્ષેત્રમાંથી બહાર કાઢવા માટે સતત પ્રયાસો કરવામાં આવી રહ્યાં છે. જેના ભાગરુપે જ પ્રધાનમંત્રી સીધા જ બન્ને દેશના નેતાઓ સાથે વાતચીત કરશે. રશિયા અને યુક્રેન વચ્ચેના યુદ્ધનો આજે 12મો દિવસ છે. વૈશ્વિક દબાણ અને તમામ પ્રકારના આકરા પ્રતિબંધો છતાં રશિયા તરફથી હુમલા વધુ તેજ બની રહ્યા છે. તે સતત યુક્રેનના રહેણાંક વિસ્તારોને નિશાન બનાવી રહ્યું છે. આ કારણે સમગ્ર વિશ્વના દેશોને લોકોની નિકાસી કરવામાં મુશ્કેલી પડી રહી છે.
આ બધા વચ્ચે ફરી એક વખત વડાપ્રધાન નરેન્દ્ર મોદી સોમવારે યુક્રેનના રાષ્ટ્રપતિ વ્લોદિમીર ઝેલેન્સ્કી સાથે ફોન પર વાત કરશે. રશિયાએ ગત 24 ફેબ્રુઆરીના રોજ યુક્રેન પર હુમલાની શરૂઆત કરી હતી. ત્યાર બાદ પ્રથમ વખત 26 ફેબ્રુઆરીના રોજ વડાપ્રધાન મોદીએ ફોન પર ઝેલેન્સ્કી સાથે વાતચીત કરી હતી. ભારતે સંયુક્ત રાષ્ટ્રમાં રશિયા વિરૂદ્ધ જે મતદાન થયું તેનાથી અંતર જાળવ્યું હતું. આ કારણે ઝેલેન્સ્કીએ વડાપ્રધાન મોદીને કહ્યું હતું કે, ભારત યુક્રેનને સંયુક્ત રાષ્ટ્ર સુરક્ષા પરિષદમાં સમર્થન આપે. જોકે ભારત આ મામલે કોઈ પણ એક પક્ષનો સાથ આપવાથી બચી રહ્યું છે. તેણે યુદ્ધના સમાધાન માટે કૂટનીતિને જરૂરી ગણાવી છે. ભારતે યુક્રેન યુદ્ધની નિંદા કરી છે અને સાથે જ રશિયા વિરૂદ્ધ મતદાનથી પણ અંતર જાળવ્યું છે.
