આજે મહાશિવરાત્રીના પાવન પર્વ નિમિત્તે છોટીકાશીનું બિરુદ પામેલા જામનગર શહેરમાં છેલ્લાં 41 વર્ષથી શિવ શોભાયાત્રાનું આયોજન કરવામાં આવે છે. જે આ વખતે 42 મા વર્ષમાં પ્રવેશ કરે છે. ત્યારે હિન્દુ ઉત્સવ સમિતિ અને મહાદેવ હર મિત્ર મંડળ દ્વારા યોજાનારી આ ભગવાન આશુતોષની રજત મઢીત પાલખી અને તેનું પૂજન આજે સવારે રામદૂત હનુમાનજી મંદિરે કરવામાં આવ્યો હતો.
શહેરના 11 દંપતીઓ દ્વારા મંત્રોચ્ચાર સાથે પૂજન વિધિ કરાવાઈ હતી અને સિધ્ધનાથ મહાદેવના મંદિરેથી શોભાયાત્રાનું પ્રસ્થાન કરવાની તૈયારી કરવામાં આવી હતી.
આ પૂજા-અર્ચનાનો લાભ જામનગર ઉત્તરના ધારાસભ્ય રીવાબા જાડેજાએ લાભ લીધો હતો અને જામનગરની જનતાને આ પાલખીયાત્રામાં જોડાવા માટે આહવાન કર્યું હતું. આ તકે ભાજપા શહેર મહામંત્રી મેરામણભાઈ ભાટુ, વોર્ડ નંબર 3 ના કોર્પોરેટરો સુભાષભાઈ જોષી, અલ્કાબા જાડેજા અને રઘુવંશી અગ્રણી તેમજ બાલા હનુમાન મંદિરના જીતુભાઈ લાલ ખાસ ઉપસ્થિત રહ્યાં હતાં. તેમજ શહેરના અનેક શિવભકતો આ પૂજામાં જોડાયા હતાં.
મહાદેવ હર મિત્ર મંડળના પ્રમુખ રાજુભાઈ વ્યાસ અને તેમની પૂરી ટીમ દ્વારા આ પૂજા વિધિની વ્યવસ્થા ગોઠવવામાં આવી હતી.
