જામનગર શહેરમાં છેલ્લા ત્રણ દિવસથી લઘુતમ તાપમાન 20 ડીગ્રી જેટલુ રહેતા શહેરીજનો ગુલાબી ઠંડીનો અહેસાસ કરી રહ્યા છે. આજે સવારે જામનગરમાં ઝાકળ ભીની સવાર જોવા મળી હતી. બીજી તરફ મહત્તમ તાપમાન 32 ડીગ્રીના પરીણામે બપોરના સમયે ગરમીથી શહેરીજનો મિશ્ર ઋતુનો અનુભવ કરી રહ્યા છે.
જામનગર શહેરમાં લઘુતમ તાપમાન 20 ડીગ્રીએ પહોંચ્યુ છે. સતત ત્રણ દિવસથી લઘુતમ તાપમાન 20 ડીગ્રી આજુબાજુ નોંધાઇ રહ્યું છે. આજે સવારે જામનગરમાં ઝાકળ ભીની જોવા મળી હતી. ઝાકળને પરીણામે વાહન ચાલકોએ મુશ્કેલીનો સામનો કરવો પડયો હતો. જામનગર કલેકટર કચેરીના કંટ્રોલરૂમના જણાવ્યા અનુસાર છેલ્લા 24 કલાક દરમિયાન જામનગરમાં લઘુતમ તાપમાન 20 ડીગ્રી, મહત્તમ તાપમાન 32 ડીગ્રી, હવામાં ભેજનું પ્રમાણ 89 ટકા તથા પવનની ગતિ 3.4 પ્રતિ કલાક નોંધાઇ હતી. મહત્તમ તાપમાન 32 ડીગ્રીને પરીણામે દિવસ દરમિયાન શહેરીજનો ગરમીનો સામનો કરી રહ્યા છે જ્યારે લઘુતમ તાપમાન 20 ડીગ્રી કરતા રાત્રીના સમયે તથા વહેલી સવારે શહેરીજનો ઠંડીનો અહેસાસ કરી રહ્યા છે. આમ મિશ્ર ઋતુને પરિણામે વાયરલ રોગચાળાના કેસો પણ વધી રહ્યા છે. શરદી, ઉધરસનો લોકો સામનો કરી રહ્યા છે.
કમોસમી વરસાદથી શહેરીજનોએ છુટકારો મેળવ્યા બાદ હવે ઠંડીનો લોકોને સામનો કરવા તૈયારી કરી રહ્યા છે. આગામી દિવસોમાં ઠંડીનું પ્રમાણ વધી શકે છે. કમોસમી વરસાદે વિરામ લેતા જામનગરના આકાશમાં વરસાદી વાદળોના આટાં ફેરા ઘટતા જઇ રહ્યા છે.
છેલ્લા 24 કલાકમાં લઘુતમ તાપમાન 0.5 ડીગ્રી ઘટયું છે. છેલ્લા 4 દિવસમાં લઘુતમ તાપમાનનો પારો અઢી ડીગ્રી નીચે ગગડી ગયો છે. ખાસ કરીને વહેલી સવારે ઠંડીની સાથે ઝાકળ પણ જોવા મળી રહી છે. જેના પરિણામે વહેલી સવારે નોકરી-ધંધા અર્થે જતાં લોકો ઠંડીનો અહેસાસ કર્યો હતો. આજથી શાળાઓ પણ શરૂ થતાં બાળકો પણ સ્વેટર પહેરવા મજબુર થયા હતાં.
