આપનું ઘર 40 ચોરસ મીટરથી નાનું છે? તો, કોર્પોરેશન તમારી પાસેથી કોઇ પણ પ્રકારનો વેરો વસૂલશે નહીં

અમદાવાદમાં મહાનગરપાલિકા વિસ્તારમાં 6,49,000 મકાનો એવા છે જેનું ક્ષેત્રફળ 40 ચો.મી. કરતાં ઓછું છે. આ પ્રકારના મકાનોમાં જે નાગરિકો રહે છે તેણે મહાનગરપાલિકાને કોઇપણ પ્રકારનો ટેકસ, ચાર્જ કે સેસ ચૂકવવાનો રહેશે નહીં. તેઓને સંપૂર્ણ કર મૂકિત મળશે. આ પ્રકારનો નિર્ણય કરવા જઇ રહી છે, અમદાવાદ મહાનગરપાલિકા.

મહાનગરપાલિકાની સ્ટેડિંગ કમિટિની બેઠકમાં આ ઉપરાંત એવો પણ નિર્ણય કરવામાં આવ્યો છે કે, જે લોકો 2020-21ના જૂનની પહેલી તારીખથી ઓગસ્ટની 31 તારીખ સુધીમાં પોતાની બાકી વેરા રકમ મહાનગરપાલિકામાં જમા કરાવશે તો તેવા કરદાતાઓને 100% વ્યાજ માફી આપવામાં આવશે.

કમિટિએ ઝાયડસ હોસ્પિટલની બાજુમાં રૂા.15 કરોડના ખર્ચે મધ્યમકદની એક હોસ્પિટલ બનાવવાનો નિર્ણય કર્યો છે. આ ઉપરાંત ટ્રસ્ટ સંચાલિત હોસ્પિટલ તથા ફિઝીયોથેરાપી સેન્ટરની ઇમારતોને 70% ટેકસ માફી આપવામાં આવશે.