રાજયની મેડિકલ કોલેજોમાં ગુજરાતી ભાષામાં અભ્યાસ કરાવવા માટે પાઠય પુસ્તકો સહિતની અન્ય સામગ્રી ગુજરાતીમાં ઉપલબ્ધ થઈ શકે તે માટે એક 17 સભ્યોની એક કમિટીની રચના કરી દેવાઈ છે. આગામી દિવસોમાં આ કમિટીને એકશન પ્લાન તૈયાર કરીને 15 દિવસમાં સરકારને સુપ્રત કરવાની તાકીદ કરાઈ છે. આમ, હવે મેડિકલ-પેરા મેડિકલ સહતના કોર્સ વિદ્યાર્થીઓ પોતાની માતૃભાષામાં ભણી શકે તે માટેની કવાયત કેન્દ્ર અને રાજય સરકાર દ્વારા શરૂ કરી દેવાઈ છે. જોકે, આ પરિપત્ર સામે કેટલાક ડોકટરોમાં નારાજગી પણ જોવા મળી રહી છે.
નેશનલ એજયુકેશન પોલિસી 2020 અંતર્ગત તાજેતરમાં નેશનલ મેડિકલ કમિશન દ્વારા દરેક રાજયોના તબીબી શિક્ષણ નિયામક સાથે વિડીયો કોન્ફરન્સ કરાઈ હતી. આ કોન્ફરન્સમાં આગામી દિવસોમાં મેડિકલ-ડેન્ટલ સહિતના તમામ આનુસાંગિક કોર્સને પણ ગુજરાતીમાં ટ્રાન્સલેટ કરવાની તાકીદ કરાઈ હતી. આ કોન્ફરન્સના અનુસંધાનમાં તબીબી શિક્ષણ વિભાગ દ્વારા 17 સભ્યોની એક કમિટીમાં દરેક મેડિકલ કોલેજના ડીનની નિયુકિત કરવામાં આવી છે. આ ઉપરાંત ગુજરાત યુનિ., સૌરાષ્ટ્ર યુનિ., એમ.એસ. યુનિવર્સિટીના કુલપતિઓના પ્રતિનિધિઓને પણ સામેલ કરવામાં આવ્યા છે. આ કમિટીનો અહેવાલ આગામી 15 દિવસમાં રજૂ કરવા પણ સૂચના આપવામાં આવી છે. આ પરિપત્ર બાદ હવે મેડિકલ-ડેન્ટલ સહિતના નર્સિંગ ફિઝિયોથેરાપીના કોર્સ પણ ગુજરાતીમાં તૈયાર કરવાની કવાયત શરૂ કરાશે. જોકે, કેન્દ્ર સરકારની આ પ્રકારની કાર્યવાહી સામે કેટલાક ડોકટરો દ્વારા નારાજગી વ્યકત કરાઈ છે. ડોકટરો કહે છે કે, મેડિકલમાં આ પ્રકારના અખતરા શકય નથી. નવી એજયુકેશન પોલિસીમાં કરાયેલી જોગવાઈ અને તેના આધારે નેશનલ મેડિકલ કમિશન દ્વારા કરાયેલા આદેશને કેટલાક અધ્યાપકો હકારાત્મક ગણી રહ્યા છે. અધ્યાપકો કહે છે કે, આ નિર્ણય ફરજિયાત નથી એટલે કે તમામ પુસ્તકો ગુજરાતીમાં જ ભણાવાશે તેવું નથી. ગુજરાતી માધ્યમના વિદ્યાર્થીઓને જયાં મુશ્કેલી નડે છે તે દૂર થશે. હાલમાં નીટ યુજી ગુજરાતીમાં લેવામાં આવે છે. આ ઉપરાંત દરેક શબ્દનું ગુજરાતી કરાશે તેવું પણ નથી. જયાં જરૂર હોય ત્યાં જ માતૃભાષામાં અનુવાદ થશે. જે શબ્દ અંગ્રેજીમાં પ્રચલિત હોય તેને કોઈપણ ભોગે ગુજરાતીમાં અનુવાદ કરવામાં નહીં આવે. રશિયા ચીન, સહિતના દેશો માતૃભાષામાં જ અભ્યાસ કરાવતા હતા, વિદેશના વિદ્યાર્થીઓ આવ્યા બાદ અંગ્રેજીમાં અભ્યાસ શરૂ કરવો પડયો છે. આજ રીતે સ્થાનિક વિદ્યાર્થીઓને અંગ્રેજીના કારણે જયાં મુશ્કેલી નડે છે તે દૂર થઈ શકે તેવો પ્રયાસ છે.
