તહેવારો આવતા જ જામનગરમાં દારૂની રેલમછેલ

જામનગર શહેરના પટેલ કોલોની શેરી નં.9/3માં આવેલા ફલેટમાંથી પોલીસે દારૂની બોટલો સાથે શખ્સને ઝડપી લઇ આગળની તપાસ હાથ ધરી હતી. જામનગરના રામેશ્વરનગર વિસ્તારમાં રહેણાંક મકાનમાંથી પોલીસે રેઇડ દરમિયાન દારૂની બોટલો સાથે શખ્સને ઝડપી લીધો હતો. જામનગરના નાગનાથ ગેઇટ પાસેના મહેશ્વરનગર ચોકમાં રહેતા શખ્સના મકાનમાંથી પોલીસે રેઇડ દરમિયાન તલાશી લેતા દારૂની બોટલો મળી આવતા કબ્જે કરી હતી.

દારૂ અંગેના દરોડાની વિગત મુજબ, પ્રથમ દરોડો જામનગરના પટેલ કોલોની શેરી નં.9/3માં આવેલા આગમન રેસીડેન્સીમાં ફલેટ નં.105માં રહેતા હર્ષ અશોક ચંદારાણા નામના શખ્સના મકાનમાંથી સીટી બી ડિવિઝન પોલીસે રેઇડ દરમિયાન મકાનની તલાશી લેતાં તેમાંથી રૂા.9000ની કિંમતની દારૂની 18 બોટલો મળી આવતા હર્ષ ચંદારાણાની પુછપરછ હાથ ધરતાં દારૂનો જથ્થો ભરત માવજી ગુજરાતી નામના શખ્સ પાસેથી ખરીદ્યાની કેફિયત આપતા પોલીસે જામનગર શહેરના રામેશ્વરનગર વિનાયક પાર્કમાં નવતન ડેરી સામે રહેતા ભરત માવજી ગુજરાતી નામના શખ્સના મકાનમાં દારૂનો જથ્થો હોવાની બાતમીના આધારે પોલીસે રેઇડ દરમિયાન તલાશી લેતાં રૂા.12,500ની કિંમતની 25 બોટલ દારૂ મળી આવતા શખ્સની અટકાયત કરી આગળની કાર્યવાહી હાથ ધરી હતી.

ત્રીજો દરોડો, જામનગરના નાગનાથ ગેઇટ પાસે આવેલા મહેશ્વરનગર ચોકમાં રહેતા દેવા ઉર્ફે દિવ્યેશ પાલજી ચાવડા નામના શખ્સના મકાનમાં દારૂનો જથ્થો હોવાની બાતમીના આધારે સીટી બી ડિવિઝન પોલીસે રેઇડ દરમિયાન તલાશી લેતાં રૂા.2500ની કિંમતની 5 બોટલ દારૂ મળી આવતા અટકાયત કરી આગળની કાર્યવાહી હાથ ધરી હતી.