મોટી ખાવડીમાંથી ભરેલા 40 લાખના પ્લાસ્ટિકના દાણાંની છેતરપિંડી

જામનગર જિલ્લાના મોટી ખાવડીમાં આવેલી ખાનગી કંપનીમાંથી પ્લાસ્ટિકના દાણા ભરેલો ટ્રક હરિયાણા પહોંચાડવાના બદલે 40 લાખના દાણા બારોબાર વેચી નાખી છેતરપિંડી આચર્યાની ટ્રાન્સપોર્ટરની ફરિયાદના આધારે પોલીસે આગળની તપાસ આરંભી હતી.

આ અંગેની વિગત મુજબ, જામનગર શહેરમાં રહેતા ટ્રાન્સપોર્ટર પ્રેમકુમાર દલાલ નામના યુવાને મોટી ખાવડી સ્થિત ખાનગી કંપનીમાંથી એચઆર-46-ડી-7248 નંબરના ટ્રકમાં રૂા.40,50,655 ની કિંમતના 33 ટન પ્લાસ્ટિકના દાણાં ભરીને હરિયાણાના હાસી ખાતે સ્થિત ધી સૂર્યા ઈન્ડસ્ટ્રીઝમાં મોકલવા માટે રવાના કર્યા હતાં. આ 40 લાખના દાણાં ભરેલો ટ્રક હરિયાણા પહોંચાડવાના બદલે પ્રદીપ અતરસિંગ નામના દિલ્હીના શખ્સે દાણાં બારોબાર લઇ જઇ ટ્રાન્સપોર્ટર સાથે વિશ્ર્વાસઘાત કર્યો હતો. આ અંગેની જાણ પોલીસમાં કરાતા પીએસઆઈ કે.આર. સિસોદિયા તથા સ્ટાફે ટ્રાન્સપોર્ટરના નિવેદનના આધારે દિલ્હીના શખ્સ વિરુધ્ધ ગુનો નોંધી શોધખોળ માટે ચક્રો ગતિમાન કર્યા હતાં.