કેન્દ્ર સરકાર દ્વારા જળ જીવન મિશન હેઠળ ગુજરાતને આપવામાં આવેલું ફંડ અગાઉના વર્ષની સરખામણીએ નાણાંકીય વર્ષ 2020-21માં બમણું થયું છે. જળ જીવન મિશન હેઠળ, કેન્દ્ર સરકારે ગુજરાતને ના.વ.2019-20માં રૂ. 390.31 કરોડ ફાળવ્યા હતા, જેની સામે ના.વ.2020-21માં રૂ. 883.08 કરોડની ફાળવણી કરવામાં આવી હતી. આ માહિતી કેન્દ્રિય જળ શક્તિ રાજ્ય મંત્રી રતનલાલ કટારીયાએ રાજ્ય સભામાં ફેબ્રુઆરી 8, 2021ના રોજ સાંસદ પરિમલ નથવાણીએ પુછેલા પ્રશ્ર્નના ઉત્તરમાં ઉપલબ્ધ બનાવી હતી.
મંત્રીના નિવેદન અનુસાર, જળ જીવન મિશનની જાહેરાત ઓગષ્ટ 15, 2019ના રોજ કરવામાં આવી હતી અને અત્યાર સુધીમાં 3.36 કરોડ ગ્રામીણ ઘરોને નળ દ્વારા પાણીના જોડાણ ઉપલબ્ધ કરાવવામાં આવ્યા છે. આ સમયગાળા દરમિયાન, ગુજરાતમાં 11.12 લાખ ઘરોને નળ દ્વારા પાણીના જોડાણ પૂરા પાડવામાં આવ્યા છે.
કેન્દ્ર સરકાર દ્વારા ના.વ. 2019-20માં ફાળવવામાં આવેલા રૂ. 390.31 કરોડ રાજ્યને ચૂકવી દેવામાં આવ્યા હતા, જ્યારે ના.વ. 2020-21માં ફાળવવામાં આવેલા રૂ. 883.08 કરોડમાંથી રૂ. 662.76 કરોડની ચૂકવણી ફેબ્રુઆરી 4, 2021ની સ્થિતિએ કરવામાં આવી છે.
પરિમલ નથવાણી જળ જીવન મિશન અંતર્ગત છેલ્લાં બે વર્ષમાં કેટલાં ઘરોને નળ દ્વારા પાણીનું જોડાણ ઉપલબ્ધ કરાવવામાં આવ્યું છે અને આ સમયગાળા દરમિયાન ગુજરાતમાં કેટલા ઘરોને પાણીનું જોડાણ આ યોજના અંતર્ગત આપવામાં આવ્યું છે તે અંગે જાણવા ઇચ્છતા હતા.
મંત્રીના નિવેદન અનુસાર, જળ જીવન મિશન હેઠળ કેન્દ્ર સરકાર દ્વારા ફાળવવામાં આવેલી રકમમાંથી ગુજરાત દ્વારા ના.વ. 2019-20માં રૂ. 384.61 કરોડ અને ના.વ. 2020-21માં ફેબ્રુઆરી 4, 2021ની સ્થિતિએ રૂ. 387.66 કરોડનો ઉપયોગ કરવામાં આવ્યો છે.
