આપણે સૌ જાણીએ છીએ કે, કોરોના સંક્રમણમાં માણસ માણસ વચ્ચેનો સંપર્ક સૌથી અગત્યની બાબત છે. કોઇ પણ પોઝિટીવ દર્દીની સાથે અથવા પોઝિટીવ દર્દીના મૃતદેહ સાથે કોઇપણ સ્વસ્થ વ્યકિત સંપર્કમાં ન આવે તે જોવું જરૂરી છે. આ માટે જ માસ્ક અને સોશ્યલ ડિસ્ટન્સનું પાલન તંત્રો દ્વારા કરાવવામાં આવતું હોય છે. જોકે, આ બંન્ને બાબતોના પાલનમાં ઘણી ખામીઓ અને બેદરકારીઓ જોવા મળી રહી છેે. લોકો ખૂદ પણ સ્થિતિ આટલી બધી વકરી ગયા પછી હજૂ આ મુદ્દે પૂરતાં જાગૃત થયા નથી.
જામનગર સહિત રાજયભરમાં રેપીડ એન્ટીજન અને આરટીપીસીઆર ટેસ્ટ મારફત પોઝિટીવ દર્દીઓને શોધવાની કસરતો ચાલે છે. પરંતુ આ કસરતો પૂરતી નથી. કોઇપણ વ્યકિત પોઝિટીવ એટલે કે, સંક્રમિત મળી આવે એટલે, તરત જ તે વ્યકિતને અન્ય લોકોથી આઇસોલેટકરવી ફરજીયાત હોય છે. પરંતુ વાસ્તવિકતામાં ઘણાં બધા કિસ્સાઓમાં આવું બનતું નથી. જે વ્યકિત પોઝિટીવ જાહેર થઇ હોય તેને હોમઆઇસોલેટ રહેવા કહેવામાં આવે છે. પરંતુ આ પ્રકારના લોકો પોતાને તમામ કિસ્સાઓમાં આઇસોલેટ કરતા નથી. ઘણાં બધા પોઝિટીવ લોકો સમાજમાં મુકત રીતે ફરતા હોય છે.
આ મુદ્દે જે કાંઇ કેસ થઇ રહ્યા છે. તેનું પ્રમાણ એકદમ ઓછું છે. બીજો મુદ્દો એ છે કે, કોઇ પણ વ્યકિત પોઝિટીવ જાહેર થાય પછી તેને હોમ આઇસોલેટ કરવાને બદલે કોઇ ચોકકસ કોવિડ કેર સેન્ટર ખાતે ફરજીયાત રીતે ખસેડવી જોઇએ. પરંતું તંત્રો એ અથવા સરકારે આ પ્રકારની કોઇ વ્યવસ્થા આટલી ગંભીર સ્થિતિ પછી પણ કરી નથી.જેના કારણે જીવતા બોમ્બ જેવા આ પોઝિટીવ લોકો અન્ય વ્યકિતઓના સંપર્કમાં આવી રહ્યા છે અને કોરોના સંક્રમણને બેકાબૂ બનાવી રહ્યા છે.
આ ઉપરાંત ઘણાં બધા પોઝિટીવ દર્દીઓના મૃત્યુ પછી તંત્ર દ્વારા કડક વ્યવસ્થા હેઠળ આ મૃતદેહોને સ્મશાને અથવા કબ્રસ્તાને પહોંચાડવામાં આવતા નથી. આ પ્રકારના મૃતદેહો પરિવારજનોના હવાલે કરવામાં આવતા હોય તેવું પણ જામગનર સહિત સમગ્ર ગુજરાતમાં જોવા મળી રહ્યું છે. આ બાબત અતિશય ગંભીર અને જોખમી છે અને હાલની ખુબ જ ચિંતાજનક સ્થિતિમાં જો પોઝિટીવ દર્દીઓ અને પોઝિટીવ મૃતદેહોને અન્ય વ્યકિતઓના સંપર્કથી દૂર રાખવામાં નહીં આવે તો પરિસ્થિતિ હજૂ પણ વધુ ખરાબ બનશે. ખરેખરતો તંત્ર એ પ્રત્યેક પોઝિટીવ દર્દી અને પોઝિટીવ મૃતદેહ પર ખાસ વોચ રાખવી જોઇએ અને જરૂરી પ્રક્રિયાઓ કડક રીતે હાથધરી અન્ય સ્વસ્થ લોકોને સંક્રમિત થવાથી બચાવવા જોઇએ.
