જામનગર શહેરમાં રણજીતસાગર રોડ પાસેથી એસઓજી પોલીસે રેઇડ દરમ્યાન બોગસ તબિબને ઝડપી લઇ આગળની કાર્યવાહી હાથ ધરી હતી.
આ અંગેની વિગત મુજબ જામનગર શહેરમાં રણજીત સાગર રોડ પુષ્કરધામ સોસાયટી શેરી નં.4માં બોગસ તબિબ લોકોના આરોગ્ય સાથે ચેડા કરતો હોવાની એસઓજીના હેકો. રાજેશભાઇ મકવાણાને બાતમી મળી હતી. બાતમીના આધારે જિલ્લા પોલીસવડા પ્રેમસુખ ડેલુની સુચના તથા એસઓજીના પીઆઇ આર.વી.વિંછીના માર્ગદર્શન મુજબ રેઇડ દરમ્યાન કલ્પેશભાઇ જીવરાજભાઇ ઉમરેટીયા નામના શખ્સને રૂા.300ની કિંમતના સ્ટેથોસ્કોપ, રૂા.1000ની કિંમતના બીપી માપવાનું મશીન, રૂા.80ની કિંમતના બે નંગ ગ્લુકોઝના બાટલા, રૂા.120ની કિંમતના 3 નંગ ગ્લુકોઝના બાટલા, રૂા.62ની કિંમતના બે નંગ ઇજેકશન, રૂા.8ની કિંમતની 4 નંગ ડિસ્પોવેન સિરિંઝ, રૂા.577ની વિવિધ કંપનીઓની એલોપેથીક દવાઓ મળી કુલ રૂા.2147નો મુદ્દામાલ કબ્જે કરી આરોપી વિરૂધ્ધ ગુજરાત મેડિકલ પ્રેકિટશનર્સ એકટ હેઠળ ગુનો નોંધી કાર્યવાહી કરી હતી.
