જામજોધપુર ગામ નજીક આવેલી માલવડાનેશ રોડ પરથી બાઈક પર પસાર થતા બે શખ્સોને આંતરીને તલાસ લેતા તેમની પાસેથી 20 નંગ ઈંગ્લીશ દારૂના ચપટા મળી આવતા બંનેની અટકાયત કરી હતી. જામનગર જિલ્લાના ઝાખર ગામ નજીકથી પોલીસે દારૂની બોટલ સાથે શખ્સને ઝડપી લીધો હતો. ધ્રોલ તાલુકાના સોયલ ટોલનાકા પાસેથી હેરીયર કારના ચાલકની તલાસી લેતા તેના કબ્જામાંથી દારૂની બોટલ મળી આવતા પોલીસે 15 લાખની કાર અને દારૂની બોટલ સાથે શખ્સને ઝડપી લઇ આગળની કાર્યવાહી હાથ ધરી હતી.
દરોડાની વિગત મુજબ, જામજોધપુર નજીક આવેલા માલવડાનેશ રોડ પરથી પસાર થતી બાઈકને સ્થાનિક પોલીસે આંતરીને કારા ગોગન ઓડેદરા અને રીયાઝ ઈસ્માઈલ સીડા નામના બે શખ્સોની તલાસી લેતા તેમના કબ્જામાંથી રૂા.5000 ની કિંમતના ઇંગ્લીશ દારૂના 20 નંગ ચપટા અને રૂા.25 હજારની કિંમતનું બાઈક મળી કુલ રૂા.30 હજારનો મુદ્દામાલ કબ્જે કરી બંનેની ધરપકડ કરી આગળની કાર્યવાહી હાથ ધરી હતી. બીજો દરોડો, જામનગર જિલ્લાના ઝાખર નજીકથી પસાર થતા રાજેન્દ્ર પ્રફુલ્લ આસિયાણી નામના શખ્સને આંતરીને મેઘપર પોલીસે તલાસી લેતા તેના કબ્જામાંથી રૂા.1000 ની કિંમતની દારૂની બે બોટલ મળી આવતા અટકાયત કરી આગળની કાર્યવાહી હાથ ધરી હતી.
ત્રીજો દરોડો, ધ્રોલ તાલુકાના સોયલ ગામના ટોલનાકા પાસેથી પસાર થતી જીજે-01-ડબલ્યુસી-0424 નંબરની હેરીયર કારને ધ્રોલ પોલીસે આંતરીને તલાસી લેતા ચાલક અનવરહુશેન ઉર્ફે અનવર ગફાર સમા નામના ચાલક પાસેથી રૂા.500 ની કિંમતની દારૂની એક બોટલ મળી આવતા પોલીસે રૂા.15 લાખની કાર અને દારૂની બોટલ સાથે શખ્સની ધરપકડ કરી હતી.
ચોથો દરોડો, જામનગર શહેરના સાધના કોલોની વિસ્તારમાં ઢાળિયા પાસેથી પસાર થતા રાહુલ અનિલ થારૂ નામના શખ્સને સિટી એ ડીવીઝન પોલીસે આંતરીને તલાસી લેતા તેના કબ્જામાંથી રૂા.100 ની કિંમતની ઈંગ્લીશ દારૂનું ચપટું મળી આવતા પૂછપરછ હાથ ધરતા આ ચપટું પંકજ ડાંગર નામના શખ્સ પાસેથી ખરીદ્યાની કેફીયત આપતા પોલીસે બંને શખ્સો વિરૂધ્ધ ગુનો નોંધી તપાસ હાથ ધરી હતી. પાંચમો દરોડો, જામનગર શહેરમાં હર્ષદમીલની ચાલીના ખુણા પાસેથી પસાર થતા દિલીપ ઉર્ફે અચો ઘેલુ સાદીયા નામના શખ્સની તલાસી લેતા તેની પાસેથી રૂા.500 ની કિંમતની દારૂની એક બોટલ મળી આવતા સિટી એ ડીવીઝન પોલીસે દિલીપની અટકાયત કરી હતી.
