હવામાન વિભાગ દ્વારા કરાયેલી આગાહીના સંદર્ભે જામનગર શહેર અને જિલ્લામાં ગુરૂવારે રાત્રિના આઠ વાગ્યાના અરસામાં વીજળીના કડાકા ભડાકા અને ચમકારા તથા પવન સાથે ધોધમાર વરસાદ વરસતાં જામનગર, લાલપુર અને જોડિયામાં સવા-સવા ઇંચ પાણી વરસાવી દીધું હતું. જો આ વરસાદ વધુ સમય પડયો હોત તો પરિસ્થિતિ કંઇક જુદી જ સર્જાઇ હોત…!
આ વર્ષે ચોમાસા પ્રારંભમાં પ્રથમ વરસાદ બાદ મેઘરાજાએ વિરામ રાખતા ખેડૂતોમાં ચિંતા ફેલાઇ ગઇ હતી. રાજ્યના મોટાભાગના જિલ્લાઓમાં મેઘાવી વિરામ રહ્યો હતો. દરમ્યાન ચોમાસાની સિઝન વિદાય થવાના આરે છે ત્યારે આગામી ચારથી પાંચ દિવસ સમગ્ર સૌરાષ્ટ્ર અને ગુજરાતમાં ભારે વરસાદની હવામાન વિભાગ દ્વારા આગાહી કરવામાં આવી છે. દરમ્યાન ગુરૂવારે રાત્રિના આઠ વાગ્યાના અરસામાં જામનગર શહેર-જિલ્લાનું હવામાન અચાનક પલટાઇ ગયું હતું. વીજળીના કડાકા ભડાકા અને ચમકારા સાથે ફૂંકાયેલા પવન વચ્ચે ધોધમાર વરસાદ શરૂ થયો હતો. આ ધોધમાર વરસાદ થોડો સમય જ રહેતાં જામનગર શહેરમાં વધુ સવા ઇંચ પાણી વરસાવી ગયો હતો. જેના કારણે શહેરના માર્ગો પર પાણી-પાણી થઇ ગયું હતું. જામનગર તાલુકામાં દરેડ ગામમાં સવા ઇંચ, જામવંથલીમાં એક ઇંચ, લાખાબાવળ, અલિયાબાડા, વસઇ, મોટી બાણુંગાર અને ફલ્લામાં વધુ અડધો ઇંચ પાણી આકાશમાંથી વરસાવ્યું હતું.
રાત્રિના તોફાની વરસાદના કારણે ધોરીમાર્ગ પર પાંચ ફુટ દૂર પણ દેખાતું ન હોવાના કારણે ટ્રાફિક પણ થોડા સમય માટે ખોરવાયો હતો. જોડિયા ગામમાં રાત્રિના સમયે તોફાની વરસાદે વધુ સવા ઇંચ પાણી વરસાવ્યું હતું. તેમજ તાલુકાના બાલંભામાં એક ઇંચ અને હડિયાણા તથા પીઠડમાં જોરદાર ઝાપટાં વરસ્યા હતા. ધ્રોલમાં સામાન્ય ઝાપટાં પડયાના અહેવાલ છે અને તાલુકાના લતીપુરમાં અડધો ઇંચ તથા જાલિયા દેવાણીમાં સામાન્ય છાંટા પડયા હતા. કાલાવડમાં પણ રાત્રિના સમયે ગાજવીજ સાથે વધુ એક ઇંચ વરસાદ વરસી ગયો હતો. તાલુકાના ગ્રામ્ય વિસ્તારોમાં નિકાવા, મોટા વડાળા, મોટા પાંચ દેવડા, ખરેડી, નવાગામમાં ઝાપટારૂપે અડધો ઇંચ પાણી પડયું હતું.
લાલપુરમાં ગત્રાત્રિના દસ વાગ્યાથી બાર વાગ્યા સુધીના બે કલાકના સમયમાં મેઘરાજાએ તોફાની બેટિંગ કરી સવા ઇંચ પાણી વરસાવ્યું હતું. જ્યારે તાલુકાના હરિપરમાં પણ સવા ઇંચ પાણી વરસ્યું હતું. પડાણા અને મોડપરમાં પોણો-પોણો ઇંચ તથા ભણગોર, મોટા ખડબા અને પીપરટોડામાં અડધો-અડધો ઇંચ વરસાદ ઝાપટા સ્વરૂપે પડયો હતો. જામજોધપુરમાં રાત્રિના સમયે જોરદાર ઝાપટારૂપે પોણો ઇંચ પાણી પડયું હતું. તાલુકાના ધુનડા ગામમાં પોણો ઇંચ, જામવાડી, વાંસજાળિયા, ધ્રાફામાં અડધો-અડધો ઇંચ અને સમાણા, શેઠવડાળા પરડવામાં સામાન્ય ઝાપટા પડયા હતા.
