જામનગર જિલ્લામાં ત્રણ જુગાર દરોડામાં નવ શખ્સ ઝડપાયા

જામનગર શહેરમાં તંબોલી માર્કેટ પાસેના વિસ્તારમાં જાહેરમાં ઘોડી-પાસાનો જુગાર રમતા પાંચ શખ્સોને પોલીસે રેઇડ દરમ્યાન રૂા.32,400ની રોકડ અને ઘોડી-પાસા સાથે ઝડપી લઇ આગળની કાર્યવાહી હાથ ધરી હતી. જામનગર શહેરમાં રાંદલ નગર વિસ્તારમાં તીનપત્તીનો જુગાર રમતા ત્રણ શખ્સોને રૂા.6,730ની રોકડ સાથે ઝડપી લીધા હતાં. જામનગર તાલુકાના સીક્કા ગામમાંથી વરલી મટકાના આંકડા લખતા શખ્સને રૂા.3920ની રોકડ અને વરલીના સાહિત્ય સાથે ઝડપી લીધો હતો.

જામનગર જિલ્લામાં જુગાર દરોડાની વિગત મુજબ પ્રથમ દરોડો જામનગર શહેરના તંબોલી માર્કેટ પાસે જાહેરમાં ઘોડી-પાસાનો જુગાર રમાતો હોવાની બાતમીના આધારે સીટી બી ડિવિઝન પોલીસ સ્ટાફે રેઇડ દરમ્યાન મહેબુબ મોસીન આરબ, ફિરોજ ઉર્ફે કડો કાસમ ખુરેશી, ઇકબાલ હુશેન ગજિયા, ઇશા ઉર્ફે ઇશો આમન જખરા તથા ઉમર હાજી ખફી નામના પાંચ શખ્સોને રૂા.32,400ની રોકડ રકમ અને ઘોડીપાસાના બે નંગ સાથે ઝડપી લઇ આગળની કાર્યવાહી હાથ ધરી હતી.

બીજા દરોડામાં જામનગર શહેરના રાંદલનગર વિસ્તારમાં સ્ટ્રીટલાઇટના અજવાળે જાહેરમાં તીનપત્તીનો જુગાર રમતા રાજદીપસિંહ રાજેન્દ્રસિંહ જેઠવા, રવિરાજસિંહ સુરુભા ઝાલા, જયદીપસિંહ ગિરૂભા જાડેજા નામના ત્રણ શખ્સોને રૂા.6,730ની રોકડ રકમ અને ગંજીપના સાથે ઝડપી લીધા હતાં તેમજ રેઇડ પૂર્વે નાસી ગયેલા યુવરાજસિંહ પૃથ્વીરાજસિંહ જાડેજા અને વિરેન્દ્રસિંહ જાડેજા સહિતના પાંચ શખ્સો વિરૂધ્ધ ગુનો નોંધી આગળની કાર્યવાહી હાથ ધરી હતી.

ત્રીજા દરોડામાં જામનગર તાલુકાના સીક્કા ગામમાંથી જાહેરમાં વરલી મટકાના આંકડા લખી પૈસાની હારજીત કરતા હુસેન ઉર્ફે કારો આમદ ભાયા નામના શખ્સને સ્થાનિક પોલીસે રેઇડ દરમ્યાન રૂા.3,920ની રોકડ રકમ અને વરલીના સાહિત્ય સાથે ઝડપી લઇ આગળની કાર્યવાહી હાથ ધરી હતી.