દુનિયાભરની સુંદરીઓ વચ્ચે યોજાયેલી 74મી મિસ યુનિવર્સ સ્પર્ધામાં આ વર્ષે મેક્સિકોની ફાતિમા બોશના માથે વિશ્વ સુંદરીનો તાજ સજાવવામાં આવ્યો છે.
આ વખતે સ્પર્ધામાં ભારત તરફથી 22 વર્ષીય મનિકા વિશ્વકર્માએ ભાગ લીધો હતો, જેમણે 100 થી વધુ દેશોની બ્યુટી ક્વીન્સ સાથે સ્પર્ધા કરી હતી. જોકે, ભારતીય સુંદરી મનિકા વિશ્વકર્મા ટોપ 30 સુધી જ રેસમાં રહી શકી અને દુર્ભાગ્યે તે ટોપ 12 માં પણ પોતાનું સ્થાન બનાવી શકી નહીં.
કોણ રહ્યું ફર્સ્ટ અને સેકન્ડ રનર–અપ?
મેક્સિકોની ફાતિમા બોશે ભલે મિસ યુનિવર્સ 2025નો ખિતાબ જીતી લીધો હોય, પરંતુ અન્ય સુંદરીઓએ પણ શાનદાર પ્રદર્શન કર્યું હતું:
- ફર્સ્ટ રનર–અપ: થાઈલેન્ડની પ્રવીણા રસિંહ.
- સેકન્ડ રનર–અપ: વેનેઝુએલા.
- થર્ડ રનર–અપ: ફિલિપિન્સ.
ફાઇનલિસ્ટમાં ચીન, કોલંબિયા, ક્યુબા, ચિલી, પ્યુઅર્ટો રિકો, માલ્ટા, કોટ ડી આઇવર અને ગ્વાડેલોપની સુંદરીઓનો પણ સમાવેશ થતો હતો. ભલે મનિકા ટોપ 12 માં ન પહોંચી શકી, પરંતુ તેના લુક્સ અને બુદ્ધિમત્તાના ખૂબ વખાણ થયા હતા.
તાજ પહેરાવનાર અને મિસ યુનિવર્સ ઓર્ગેનાઇઝેશન
મિસ યુનિવર્સ 2025ની વિજેતા ફાતિમા બોશને ગયા વર્ષની વિજેતા, મિસ યુનિવર્સ 2024 વિક્ટોરિયા કેજર થેલવિગ (ડેનમાર્ક) દ્વારા તાજ પહેરાવવામાં આવ્યો હતો. વિક્ટોરિયાએ 16 નવેમ્બર 2024ના રોજ આ ખિતાબ જીત્યો હતો અને તે આ તાજ જીતનારી ડેનમાર્કની પ્રથમ મહિલા હતી.
1952માં સ્થપાયેલું મિસ યુનિવર્સ ઓર્ગેનાઇઝેશન વિશ્વભરની મહિલાઓને નેતૃત્વ, શિક્ષણ, સામાજિક અસર, વિવિધતા અને વ્યક્તિગત વિકાસને પ્રોત્સાહન આપવા માટે એક મંચ પૂરું પાડે છે.
વિવાદોથી ઘેરાયેલી સ્પર્ધા
જોકે, આ વર્ષની આ સ્પર્ધા વિવાદોના કારણે પણ ખૂબ ચર્ચામાં રહી હતી.
- જજ અને સંગીતકાર ઉમર હાર્ફૂચે ફાઇનલના ત્રણ દિવસ પહેલા જ રાજીનામું આપ્યું હતું. તેમણે આરોપ લગાવ્યો હતો કે જ્યુરીના સભ્યનો એક સ્પર્ધક સાથે અફેર ચાલી રહ્યું છે અને ટોપ 30 પહેલાથી જ ફિક્સ હતી.
- તેમના પછી ફ્રેન્ચ ફૂટબોલ મેનેજર ક્લાઉડ મેકેલેલેએ પણ અંગત કારણો આપીને અચાનક રાજીનામું આપી દીધું હતું.
વિજેતા ફાતિમા પણ વિવાદમાં!
મિસ યુનિવર્સ ફાતિમા બોશ તો સ્પર્ધાની શરૂઆતથી જ વિવાદમાં આવી ગઈ હતી! બે અઠવાડિયા પહેલા મિસ યુનિવર્સના હોસ્ટ નવત ઇત્સરા ગ્રિસિલએ જાહેરમાં ફાતિમાને ‘Dumbhead’ કહીને સંબોધી હતી. આ ઘટના પછી, ફાતિમાના સમર્થનમાં અન્ય ઘણી સ્પર્ધકો વોકઆઉટ કરી ગઈ હતી. વિવાદ વધતા, આખરે હોસ્ટે માફી માંગવી પડી હતી.
