જામનગર તાલુકાના આમરા ગામની સીમમાં આવેલાં વાડી વિસ્તારમાંથી એલસીબીએ રેઇડ દરમ્યાન 177 બોટલ દારૂ અને 24 નંગ બિયરના ટીન સાથે શખ્સને ઝડપી લઇ પુછપરછ હાથ ધરી હતી. જામનગર તાલુકાના સીક્કા ગામમાંથી પસાર થતી કારમાંથી પોલીસે 84 બોટલ સાથે પોરબંદરના શખ્સને ઝડપી લઇ પૂછપરછ હાથ ધરી હતી. જામનગર તાલુકાના બેડ ગામમાંથી પોલીસે દારૂની બોટલ સાથે શખ્સને ઝડપી લીધો હતો. જોડિયા તાલુકાના મોરાણા ગામમાંથી દારૂની બોટલ સાથે પસાર થતાં શખ્સને પોલીસે પકડી લઇ પુછપરછ આરંભી હતી. જોડિયા તાલુકાના ટીંબડી ગામથી બંગાવડી જવાના માર્ગ પરથી શખ્સને દારૂની બોટલ સાથે ઝડપી લીધો હતો.
દારૂ અંગેના દરોડાની વિગત મુજબ, પ્રથમ દરોડો જામનગર તાલુકાના આમરા ગામની સીમના વાડી વિસ્તારમાં રહેતા પ્રવિણ ધના પરમાર નામના શખ્સના ખેતરમાં દારૂનો જથ્થો હોવાની એલસીબીના કિશોર પરમાર અને અશોક સોલંકીને મળેલી બાતમીના આધારે ઈન્ચાર્જ પોલીસવડા નિતેશ પાંડેયની સૂચનાથી પીઆઈ એસ.એસ. નિનામા તથા ટીમ દ્વારા રેઈડ દરમિયાન તલાસી લેતા વાડીમાંથી રૂા.70,800 ની કિંમતની 177 બોટલ દારૂ અને રૂા.2400 ની કિંમતના 24 નંગ બીયરના ટીન મળી કુલ રૂા.73,200 નો મુદ્દામાલ કબ્જે કરી પ્રવિણની ધરપકડ કરી પૂછપરછ હાથ ધરતા આ દારૂનો જથ્થો જામનગરના મામુ દરબાર પાસેથી ખરીદ્યાની કેફીયત આપતા એલસીબીની ટીમે બે શખ્સો વિરૂધ્ધ ગુનો નોંધી આગળની કાર્યવાહી હાથ ધરી હતી.
બીજો દરોડો, જામનગર તાલુકાના સીક્કા ગામ નજીકથી પસાર થતી જીજે-35-ડી-5956 નંબરની કારને આંતરીને તલાસી લેતા તેમાંથી રૂા.42 હજારની કિંમતની 84 બોટલ દારૂ મળી આવતા સીક્કા પોલીસે રાણાવાવ તાલુકાના નેશ હનુમાનગઢ ગામના સરમત ઉર્ફે ભરત વેજા કટારા નામના શખ્સને 42 હજારનો દારૂ, 5,50,000 ની કિંમતની બ્રેઝા કાર અને 5000 નો મોબાઇલ મળી કુલ રૂા.5,97,000 ના મુદ્દામાલ સાથે ઝડપી લઇ પૂછપરછ હાથ ધરતા દારૂના જથ્થામાં હરપાલસિંહ દિલુભા ચાવડાની સંડોવણી ખુલ્લી હતી. જેના આધારે પોલીસે આગળની કાર્યવાહી હાથ ધરી હતી.
ત્રીજો દરોડો જામનગર તાલુકાના બેડ ગામમાંથી પસાર થતા પિયુષ પ્રેમચંદ હરિયા નામના શખ્સને પોલીસે આંતરીને તલાસી લેતા તેના કબ્જામાંથી રૂા.1000 ની કિંમતની દારૂની બે બોટલ મળી આવતા અટકાયત કરી આગળની કાર્યવાહી હાથ ધરી હતી. ચોથો દરોડો, જોડિયા તાલુકાના મોરાણા ગામમાંથી પસાર થતા આશિષ કારુ ગણેશિયા નામના શખ્સને આંતરીને સ્થાનિક પોલીસે તલાસી લેતા તેની પાસેથી રૂા.500 ની કિંમતની દારૂની બોટલ મળી આવતા પોલીસે આગળની કાર્યવાહી હાથ ધરી હતી.
પાંચમો દરોડો, જોડિયા તાલુકાના ટીંબડી ગામથી બંગાવડી જવાના માર્ગ પરથી પસાર થતા અશ્ર્વિનસિંહ ઉર્ફે અશોક ટેમુભા જાડેજા નામના શખ્સની તલાસી લેતા તેની પાસેથી રૂા.400 ની કિંમતની દારૂની બોટલ મળી આવતા પોલીસે પૂછપરછ હાથ ધરતા આ દારૂના જથ્થામાં ક્રિપાલસિંહ ખુમુભા જાડેજા નામના શખ્સની સંડોવણી ખુલ્લી હતી. જેના આધારે પોલીસે બે શખ્સો વિરૂધ્ધ ગુનો નોંધી તપાસ આરંભી હતી.
