લાખોટા મ્યુઝિયમ પર વિજળી પડવાથી નુકસાન

જામનગરમાં રણમલ તળાવ વચ્ચે આવેલા લાખોટા કોઠા પર વિજળી પડતાં અહીં સ્થિત મ્યુઝિયમને મોટા પ્રમાણમાં નુકસાન પહોંચ્યું છે. મ્યુઝિયમમાં થયેલા નુકસાનની તસવીરો સામે આવી છે. ત્યારે સત્તાધિશો તરફથી આ અંગે હજૂ સુધી ફોડ પાડવામાં આવ્યો નથી. લાખોટા મ્યુઝિયમ પર વિજળી પડવાના કારણે કોઠાની ઇમારત તથા અંદરની પુરાતન વસ્તુઓને નુકસાન પહોંચ્યાનું જાણવા મળ્યું છે. જો કે, વિજળી પડવાની આ ઘટના અંગે મ્યુઝિયમ સત્તાધિશો કે જામ્યુકોના અધિકારીઓનો સંપર્ક થઇ શકયો નથી. જેને કારણે કેટલું નુકસાન થયું? તેનો આંકડો કે તાગ મેળવી શકાયો નથી. જવાબદારો દ્વારા આ અંગે સર્વે કરવામાં આવ્યા બાદ કોઇ ચોક્કસ તારણ રજૂ કરવામાં આવશે તેવું જાણવા મળ્યું છે.