જોડિયા તાલુકાના લખતર ગામની સીમમાંથી એલસીબીની ટીમે મળેલી બાતમીના આધારે શખ્સને દારૂની બોટલો રોકડ રકમ અને મોબાઇલ સહિત કુલ રૂા.14,600 ના મુદ્દામાલ સાથે ઝડપી લીધો હતો. જામનગરના મોમાઈનગર વિસ્તારમાં પોલીસે ચાર બોટલ દારૂ સાથે શખ્સને ઝડપી લીધો હતો. જામનગરમાં ગુરૂદ્વારા પાસેથી પોલીસે એક શખ્સને ચાર બોટલ દારૂ અને મોબાઇલ સાથે ઝડપી લઇ પૂછપરછ હાથ ધરી હતી.
દરોડાની વિગત મુજબ, પ્રથમ દરોડો જોડિયા તાલુકાના લખતર ગામની સીમમાંથી દારૂ સાથે પસાર થવાની એલસીબીના મયુરસિંહ પરમાર, ઋષિરાજસિંહ વાળા, હરદીપ બારડને મળેલી બાતમીના આધારે પીઆઈ જે.વી. ચૌધરી, પીએસઆઇ આર.કે. કરમટા, એસ.પી. ગોહિલ, પી.એન. મોરી તથા સ્ટાફના સંજયસિંહ વાળા, હરપાલસિંહ સોઢા, ભરતભાઈ પટેલ, નાનજીભાઈ પટેલ, દિલીપભાઈ તલવાડિયા, હરદીપભાઈ ઘાઘલ, વનરાજભાઈ મકવાણા, ધાનાભાઈ મોરી, હિતેન્દ્રસિંહ જાડેજા, અરજણભાઈ કોડીયાતર, મયુદીનભાઈ સૈયદ, ક્રિપાલસિંહ જાડેજા, નિર્મળસિંહ જાડેજા, કિશોરભાઈ પરમાર, હરદીપભાઇ બારડ, ઋષિરાજસિંહ વાળા, મયુરસિંહ પરમાર, કલ્પેશભાઈ મૈયડ, ધર્મેન્દ્રસિંહ જાડેજા, દયારામ ત્રિવેદી, બિજલભાઈ બારાસરા સહિતના સ્ટાફે વોચ ગોઠવી લખતરના વાડી વિસ્તારમાંથી ચિરાગ પ્રવિણ ચૌહાણ નામના શખ્સને આંતરીને તલાસી લેતા તેના કબ્જામાંથી રૂા.1600 ની કિંમતની ઈંગ્લીશ દારૂની ચાર બોટલ અને પાંચ હજારની કિંમતનો મોબાઇલ તથા આઠ હજારની રોકડ રકમ સહિત રૂા.14600 ના મુદ્દામાલ સાથે ઝડપી લીધો હતો.
બીજો દરોડો, જામનગર શહેરના મોમાઈનગર શેરી નં.3 માં જીજે-10-સીકે-2194 નંબરના એકસેસ પર પસાર થતા મયુરસિંહ ઉર્ફે જાકુબ ભરતસિંહ જેઠવા નામના શખ્સને સિટી બી ડીવીઝન પોલીસ સ્ટાફે આંતરીને તલાસી લેતા તેના કબ્જામાંથી રૂા.2000 ની કિંમતની ઈંગ્લીશ દારૂની ચાર બોટલ મળી આવતા ધરપકડ કરી ગુનો નોંધી આગળની કાર્યવાહી હાથ ધરી હતી. ત્રીજો દરોડો, જામનગર શહેરના ગુરૂદ્વારા પાસેથી પસાર થતા અરજણ માંડણ જોગલ નામના શખ્સને સિટી બી ડીવીઝન પોલીસ સ્ટાફે આંતરીને તલાસી લેતા તેના કબ્જામાંથી રૂા.2000 ની કિંમતની દારૂની ચાર બોટલ અને રૂા.5000 ની કિંમતનો મોબાઇલ ફોન સહિત કુલ રૂા.7000 નો મુદ્દામાલ કબ્જે કરી પૂછપરછ હાથ ધરતા આ દારૂનો જથ્થો જૂનાગઢના અરજણ પરબત કરમટાની સંડોવણી ખુલતા પોલીસે બે શખ્સો વિરૂધ્ધ ગુનો નોંધી તપાસ આરંભી હતી.
