કેન્દ્રીય નાણા મંત્રી નિર્મલા સીતારમણે મંગળવારે યુક્રેન સંકટને કારણે ક્રૂડ ઓઈલની વધતી કિંમતો અંગે ચિંતા વ્યક્ત કરી હતી અને સંકેત આપ્યો હતો કે કેન્દ્ર સરકાર વૈકલ્પિક સ્ત્રોતોનો ઉપયોગ કરવાનું વિચારી રહી છે. નિર્મલા સિતારમણે ક્રૂડ ઓઇલની વધતી કિંમતો અને યુક્રેન-રશિયા સંઘર્ષની ભારતીય અર્થવ્યવસ્થા પર પડેલ અસરને લઇને જણાવ્યું હતું કે ચોક્કસપણે તેની ભારતીય અર્થવ્યવસ્થા પર અસર પડશે. તેમણે કહ્યું કે ભારત ક્રૂડ ઓઈલની કુલ જરૂરિયાતના 85 ટકાથી વધુ આયાતથી પૂરી કરે છે અને જ્યારે ક્રુડ ઓઈલના ભાવ વધે છે ત્યારે તે ચિંતાનો વિષય બને છે.
નાણામંત્રીએ કહ્યું કે ઓઈલ માર્કેટિંગ કંપનીઓ 15 દિવસની સરેરાશના આધારે છૂટક કિંમતો નક્કી કરે છે, પરંતુ હવે આપણે જે આંકડાઓ વિશે વાત કરી રહ્યા છીએ તે એવરેજથી વધુ છે. તેમણે કહ્યું કે સરકાર ક્રૂડ મેળવવા માટે વૈકલ્પિક સ્ત્રોત શોધી રહી છે, પરંતુ વૈશ્વિક બજારમાં તમામ સ્ત્રોતો સમાન રીતે અકલ્પનીય છે. સીતારમણે કહ્યું કે ક્રૂડ ઓઈલની વધતી કિંમતોની અસર પડશે, અને બજેટમાં કેટલીક જોગવાઈઓ કરવામાં આવી છે, પરંતુ તે માત્ર સામાન્ય વધઘટ પર આધારિત છે, પરંતુ હવે સ્થિતિ તેનાથી આગળ છે. તેઓએ કહ્યું કે આપણે તે કેવી રીતે ઉકેલી શકીએ તે જોવાનું છે. આંતરરાષ્ટ્રીય ઓઇલ સ્ટાન્ડર્ડ બ્રેન્ટ ક્રૂડ મંગળવારે લગભગ $127 પ્રતિ બેરલ પર હતું.
