સાંસદ પૂનમબેન માડમને કરેલી રજૂઆત બાદ ધ્રોલથી જામનગરની બસ શરૂ થતા ગ્રામજનોમાં ખુશી

ધ્રોલ એસ.ટી.ડેપોમાંથી વહેલી સવારે 5:15 વાગ્યે ઉપડતી બસ ધ્રોલથી જામનગર વાયા જોડિયા-કુનડ-લીંબુડા-હડિયાણા-ખીરી- વાધા- રામપર થઈને જામનગર પહોંચતી હતી. આ રૂટને ધ્રોલ ડેપોમાંથી બંધ કરવા માટે જાહેર કરવામાં આવ્યું હતું. તેની જાણ દરેક ગામના આગેવાનોને થવાથી દરેક ગામના આગેવાનો એ જામનગર જિલ્લાના સાંસદ સભ્ય પૂનમબેન માડમને લેખિતમાં રજૂઆત કરી હતી. જામનગર જિલ્લાના સાંસદ પૂનમબેન માડમ દ્વારા એસ.ટી.વિભાગીય નિયામકને આ બાબતે રજૂઆત કરવામાં આવી હતી અને વિભાગીય નિયામક એ રજુઆત સાંભળીને ધ્રોલ ડેપો મેનેજરને જાણ કરી જણાવ્યું હતું કે વહેલી સવારે જે રૂટ બંધ કરવામાં આવ્યો છે તે શનિવારથી ફરી ચાલુ રાખવાનો આદેશ આપ્યો હતો. આ વાતની દરેક ગ્રામજનોને જાણ થતાં જ જામનગર જિલ્લાના સાંસદ સભ્ય પૂનમબેન માડમનો આભાર માન્યો હતો.