ખંભાળિયા નજીક વાડી વિસ્તારમાં જુગાર રમતા ચાર શખ્સો ઝડપાયા

ખંભાળિયા – સલાયા માર્ગ પર અત્રેથી આશરે ચાર કિલોમીટર દૂર હર્ષદપુર ગામના વાડી વિસ્તારમાં ગતસાંજે સ્થાનિક પોલીસે જુગાર દરોડો પાડી, અને બાવળના ઝાડ નીચે બેસીને ગંજીપત્તા વડે જુગારની મોજ માણી રહેલા હિરેન અશોકભાઈ મોખરા, વીરપાર હરદાસ મસુરા, ધીરજલાલ જગજીવનભાઈ મોદી અને અમૂલ વસંતરાય પંચમતીયા નામના ચાર શખ્સોને ઝડપી લઇ, રૂપિયા 13,900 રોકડા તથા રૂા.10,500 ની કિંમતના ત્રણ મોબાઈલ ફોન ઉપરાંત રૂપિયા 45,000 ની કિંમતના બે મોટરસાયકલ મળી કુલ, રૂપિયા 69,400 નો મુદ્દામાલ કબજે કર્યો હતો.

આ દરોડા દરમ્યાન સલાયાનો અજીજ ભડાલા અને ખંભાળિયાનો રામજી પરમાર નામના બે શખ્સો નાસી છૂટ્યા હતા. ખંભાળિયા પોલીસે જુગારધારાની કલમ હેઠળ ગુનો નોંધી, આગળની કાર્યવાહી હાથ ધરી છે