જામનગર શહેરમાં નવાગામ ઘેડમાંથી જૂગાર રમતા બે શખ્સોને પોલીસે ઝડપી લઇ નાશી ગયેલા પાંચ શખ્સોની શોધખોળ હાથ ધરી હતી. જામનગર શહેરના મુખ્ય રાજમાર્ગ એવા અને ટ્રાફિકથી ધમધમતા ટાઉન હોલ વિસ્તારમાં જાહેરમાં વર્લીના આંકડા લખી જૂગાર રમતા શખ્સને પોલીસે દબોચી લઇ નાશી ગયેલા શખ્સોની તપાસ આરંભી હતી.
જામનગરના નાગેશ્ર્વર કોલોની વિસ્તારમાંથી પોલીસે કાટછાપનો જૂગાર રમતા બે શખ્સોને પકડી પાડયા હતાં.
પ્રથમ દરોડો, જામનગર શહેરમાં નવાગામ ઘેડ રામદેવપીરના ચોકમાં તીનપતિનો જૂગાર રમાતો હોવાની પોલીસને મળેલી બાતમીના આધારે રેઈડ દરમિયાન દિનેશ મુળુ ગોધમ, સાગર ગોવિંદ માડમ નામના બે શખ્સોને ઝડપી લઇ તેની પાસેથી રૂા.11,300 ની રોકડ અને ગંજીપના કબ્જે કર્યા હતાં. રેઈડ દરમિયાન અમરશી નાથા પરમાર, નરેશ ઉર્ફે નરો પરસોતમ પરમાર, જયુ રમેશ ચાવડા, નીતિન ઉર્ફે નીતિયો બાબુ વાઘેલા અને લાલો ભરત નામના પાંચ શખ્સો નાશી જતાં તમામ સામે ગુનો નોંધી આગળની કાર્યવાહી હાથ ધરી હતી.
બીજો દરોડો, જામનગર શહેરના ટાઉન હોલ વિસ્તારમાંથી વર્લીમટકાનો જૂગાર રમાતો હોવાની બાતમીના આધારે પોલીસે કમલેશ કિશોરપરી ગોસ્વામી નામના શખ્સને રૂા.700 ની રોકડ, રૂા.3000 ની કિંમતનો મોબાઇલ, રૂા.25000 ની રીક્ષા અને રૂા.28,700 ના મુદ્દામાલ સાથે દબોચી લઇ નાશી ગયેલા હરશ્યામ અને બલરાજ નામના બે શખ્સોની શોધખોળ હાથ ધરી હતી.
ત્રીજો દરોડો, જામનગર શહેરના નાગેશ્ર્વર કોલોની વિસ્તારમાં કાટ છાપનો જૂગાર રમતા હોવાની બાતમીના આધારે પોલીસે રેઈડ દરમિયાન સુનિલ ભરત બારિયા અને ગોપાલ છગન ઢાપા નામના બે શખ્સોને જૂગાર રમતા ઝડપી લઇ રૂા.4001 નો મુદ્દામાલ કબ્જે કરી આગળની કાર્યવાહી હાથ ધરી હતી.
