જામનગર શહેરમાં આર્મી એરિયામાં રહેતાં અને રાઈફલમેન તરીકે ફરજ બજાવતો યુવક B.P.E.T. ટેસ્ટ માટે સોમવારે વહેલીસવારના સમયે રનિંગ કરતો હતો તે દરમિયાન એકાએક પડી જતા બેશુદ્ધ થઈ જવાથી આર્મી હોસ્પિટલમાં સારવાર માટે ખસેડવામાં આવતા જ્યાં તેનું મોત નિપજ્યાનું તબીબોએ જાહેર કર્યુ હતું.
મળતી વિગત મુજબ, જમ્મુના સામ્બા જિલ્લાના પંથી ગામનો વતની અને જામનગરના આર્મી એરિયામાં રહેતો તથા રાઈફલમેન તરીકે ફરજ બજાવતો સિવિલ અહેમદ બસીર અહેમદ (ઉ.વ.22) નામનો યુવક B.P.E.T. ટેસ્ટ માટેની અંતર્ગત સોમવારે વહેલીસવારે આર્મી એરિયામાં રનિંગ કરતો હતો તે દરમિયાન અચાનક પડી જતાં બેશુદ્ધ થઈ જવાથી યુવકને સારવાર માટે આર્મીની હોસ્પિટલમાં ખસેડવામાં આવ્યો હતો. જ્યાં ફરજ પરના તબીબોએ જવાનનું મોત નિપજ્યાનું જાહેર કર્યુ હતું. આ અંગે ધનરાજસિંગ વાઈખોસ દ્વારા જાણ કરાતા હેકો એસ.એસ. દાતણિયા તથા સ્ટાફે હોસ્પિટલ પહોંચી જઈ મૃતદેહનો કબ્જો સંભાળી આગળની કાર્યવાહી હાથ ધરી હતી.
