દેવભૂમિ દ્વારકા તાલુકાના વસઈ ગામના રહીશ લખમણભા નથુભા માણેક નામના 40 વર્ષના શખ્સ સામે થોડા સમય પૂર્વે સ્થાનિક પોલીસ મથકમાં જુદા જુદા પ્રકારના ગંભીર ગુનાઓ નોંધાયા હતા. આના અનુસંધાને દેવભૂમિ દ્વારકા જિલ્લા સ્થાનિક ગુના શોધક શાખાના પી.આઈ. કે. કે. ગોહિલના વડપણ હેઠળ પી.એસ.આઈ. બી.એમ. દેવમુરારી અને તેમની ટીમ દ્વારા ઉપરોક્ત શખ્સ અંગેના ગુનાહિત ઇતિહાસની સંપૂર્ણ માહિતી એકત્ર કરી અને પાસા અંગેની અસરકારક દરખાસ્ત તૈયાર કરી, જિલ્લા કલેકટર આર.એમ. તન્ના સમક્ષ રજુ કરવામાં આવી હતી.
જેથી જિલ્લા કલેકટર દ્વારા આ અંગેનો હકારાત્મક અભિગમ અપનાવીને ઉપરોક્ત શખ્સના પાસાની દરખાસ્ત મંજૂર રાખવામાં આવી હતી. આના અનુસંધાને એલ.સી.બી. પીએસઆઈ ભાર્ગવ દેવમુરારી તેમજ તેમની ટીમે આરોપી લખમણભા નથુભા માણેકને રાઉન્ડ અપ કરી અને સુરતની લાજપોર મધ્યસ્થ જેલ ખાતે મોકલી આપવાની તજવીજ કરી હતી. આ સમગ્ર કાર્યવાહી ઈન્ચાર્જ અધિક જિલ્લા મેજિસ્ટ્રેટ રિધ્ધીબેન રાજ્યગુરુ, નાયબ કલેકટર મનોજકુમાર દેસાઈ, એલ.સી.બી. પી.આઈ. કે. કે. ગોહિલ તેમજ તેમની ટીમ દ્વારા કરવામાં આવી હતી.
