રમતગમત, યુવા અને સાંસ્કૃતિક પ્રવૃત્તિઓ વિભાગ તથા કમિશનર યુવક સેવા અને સાંસ્કૃતિક પ્રવૃત્તિઓ, ગાંધીનગર દ્વારા પ્રેરિત અને જિલ્લા વિકાસ અધિકારી-જામનગરના માર્ગદર્શન હેઠળ તાજેતરમાં ‘જિલ્લા-શહેર કક્ષાની બાલ પ્રતિભા શોધ સ્પર્ધા-૨૦૨૫’ નું ભવ્ય આયોજન કરવામાં આવ્યું હતું. આ સ્પર્ધામાં જામનગરની શાળા નં-૧૮ ના વિદ્યાર્થીઓએ પોતાની કલાનું ઉત્કૃષ્ટ પ્રદર્શન કરી શાળા તેમજ પરિવારનું નામ રોશન કર્યું છે.
શાળાના તેજસ્વી બાળ કલાકારોએ અલગ-અલગ વિભાગોમાં પોતાની પ્રતિભાના જોરે નીચે મુજબના સ્થાન પ્રાપ્ત કર્યા છે:
- વક્તૃત્વ સ્પર્ધા: વિભાગ-બ (વયજુથ ૧૦ થી ૧૩) માં દેવાંશી ડી. પાગડાએ મનનીય રજૂઆત દ્વારા પ્રથમ ક્રમ હાંસલ કર્યો છે.
- એકપાત્રીય અભિનય: આ જ વયજુથમાં રૂહી મગરાએ પોતાની અભિનય કલાથી સૌને મંત્રમુગ્ધ કરી પ્રથમ ક્રમ મેળવ્યો છે.
- દુહા-છંદ-ચોપાઈ: ખુલ્લા વિભાગ (વયજુથ ૭ થી ૧૩) માં મેઘના લિંબડએ પોતાની ગાયકી અને રજૂઆત દ્વારા દ્વિતીય સ્થાન પ્રાપ્ત કરી વિજેતા જાહેર થયા છે.
બાળકોની આ સફળતા પાછળ શાળાના શિક્ષકોની સખત મહેનત રહેલી છે. આ સ્પર્ધા માટે જાડેજા ગાયત્રીબાએ માર્ગદર્શક તરીકે સેવા આપી હતી, જ્યારે રંજનબેન નકુમએ કન્વીનર તરીકે અને દિપકભાઈ પાગડાએ મેનેજર તરીકેની જવાબદારી નિભાવી બાળકોને પ્રોત્સાહિત કર્યા હતા.
વિજેતા થયેલા બાળ કલાકારોને નિર્ણાયકગણ અને ઉપસ્થિત મહાનુભાવો દ્વારા બિરદાવવામાં આવ્યા હતા. જેમાં ભાવનાબા ઝાલા, પિયુષભાઈ પંડ્યા, દુષ્યંતભાઈ પુરોહિત, શક્તિસિંહ જાડેજા, સહદેવભાઈ તથા દિગ્વિજયસિંહ ઝાલાનો સમાવેશ થાય છે. આ ઉપરાંત તાલુકા યુવા વિકાસ અધિકારી હિતેશભાઈ વાળા, ભરતભાઈ પરમાર અને જિલ્લા યુવા વિકાસ અધિકારી એમ.આઈ. પઠાણે શાળાની આ સિદ્ધિની પ્રશંસા કરી હતી.
શાળાના મુખ્ય શિક્ષક દિપકભાઈ પાગડાએ શાળા પરિવાર વતી તમામ વિજેતાઓને અભિનંદન પાઠવતા જણાવ્યું હતું કે, આ બાળકો હવે સૌરાષ્ટ્ર પ્રાંત કક્ષાએ જામનગરનું નેતૃત્વ કરશે. તેઓ ત્યાં પણ જવલંત વિજય મેળવી શાળાનું નામ રોશન કરે તેવી શુભેચ્છાઓ તેમણે વ્યક્ત કરી હતી.
