ભાજપની કેન્દ્રીય ચૂંટણી સમિતિ લોકસભા ચૂંટણીના ઉમેદવારોના નામ નક્કી કરવા માટે રવિવારે બેઠક કરશે. પાર્ટી બીજી યાદીમાં ઓછામાં ઓછા 150 ઉમેદવારોની જાહેરાત કરવાની તૈયારી કરી રહી છે. છેલ્લા બે દિવસ દરમિયાન રાજસ્થાન, હિમાચલ પ્રદેશ, હરિયાણા સહિત આઠ રાજયોના કોર ગ્રૂપ સાથે ચર્ચા કરીને મોટાભાગની સીટો માટેના નામ નક્કી કરવામાં આવ્યા છે. CECની બેઠક પહેલા મહારાષ્ટ્ર અને બિહારના કોર ગ્રૂપની બેઠક થશે.
પાર્ટીની ટોચની નેતાગીરી દરેક સીટ પર ચર્ચા કરવા માટે બુધવારથી રાજયોના કોર ગ્રૂપ સાથે બેઠક કરી રહી છે. અત્યાર સુધી રાજસ્થાન, તમિલનાડુ, આંધ્રપ્રદેશ, કર્ણાટક, હિમાચલ પ્રદેશ, હરિયાણા, ઓડિશાના કોર ગ્રૂપ સાથે બેઠકો યોજવામાં આવી છે. આ જ ક્રમમાં મહારાષ્ટ્ર પર પણ પ્રાથમિક ચર્ચા થઈ છે. પાર્ટીના સૂત્રોનું કહેવું છે કે આ બેઠકોમાં 150 સીટો માટેના નામ લગભગ ફાઈનલ થઈ ગયા છે.
બીજી યાદીમાં ઉત્તર પ્રદેશની કેટલીક વધુ બેઠકો માટે ઉમેદવારો જાહેર કરવામાં આવશે. આ સિવાય ઉત્તરાખંડ અને દિલ્હીની બાકીની બે બેઠકો, હિમાચલ પ્રદેશની ચારેય બેઠકો અને હરિયાણાની આઠ બેઠકો પર ઉમેદવારો જાહેર કરવામાં આવશે. પાર્ટીના સૂત્રોનું કહેવું છે કે રાયબરેલી સીટ અંગેની જાહેરાત બાદમાં કરવામાં આવી શકે છે. સૂત્રોએ જણાવ્યું હતું કે બિહારમાં સીટ શેરિંગ ફોર્મ્યુલા પર સર્વસંમતિના અભાવને કારણે ગુરુવારે સૂચિત કોર ગ્રૂપની બેઠક સ્થગિત કરવામાં આવી હતી. વાસ્તવમાં, ભાજપ પોતે અહીં ઓછામાં ઓછી 17 બેઠકો પર ચૂંટણી લડવા માંગે છે, જયારે તે જેડીયુને મહત્તમ 13 બેઠકો, ઉપેન્દ્ર કુશવાહાને બે બેઠકો અને જીતન રામ માંઝીને એક બેઠક આપવા માંગે છે. પાર્ટી એલજેપીને પાંચથી વધુ સીટો આપવા માંગતી નથી. મુશ્કેલી એ છે કે એલજેપીના બંને જૂથો પહેલાની જેમ છ-છ બેઠકો પર પોતાનો દાવો રજૂ કરી રહ્યા છે. આ સિવાય ભાજપ અને જેડીયુ વચ્ચે કેટલીક સીટોની અદલાબદલી પણ થવાની છે. મહારાષ્ટ્રમાં સીટોની વહેંચણીમાં વધુ કે ઓછી સર્વસંમતિ સધાઈ ગયા બાદ સીટો માર્ક કરવાની પ્રક્રિયા શરૂ થઈ ગઈ છે. અહીં એવું કહેવામાં આવી રહ્યું છે કે શિવસેના શિંદે જૂથને 10 બેઠકો અને NCP અજીત જૂથને પાંચ બેઠકો આપવામાં આવશે.
