જામનગર નજીક જીપે સાસુ-વહુને ઠોકરે ચડાવતા વૃદ્ધ સાસુનું મોત

જામનગર-ખંભાળિયા ધોરીમાર્ગ પર નાઘેડી ગામના પાટીયા નજીક આવેલી ગ્રીનવીલા સોસાયટીના ગેઈટ પાસે રોડ ક્રોસ કરતા સમયે વૃધ્ધાને પૂરઝડપે બેફીકરાઈથી આવતા વાહને ઠોકર મારી હડફેટે લેતા ઘટનાસ્થળે મોત નિપજ્યું હતું. અન્ય મહિલાને ગંભીર ઈજા પહોંચી હતી.

અકસ્માતના બનાવની વિગત મુજબ, જામનગર-ખંભાળિયા ધોરીમાર્ગ પર નાઘેડી ગામના પાટીયા નજીક આવેલી ગ્રીનવિલા સોસાયટીમાં રહેતા લક્ષ્મીબેન જીવાભાઈ સોનરાત અને સરોજબેન નામના બન્ને શુક્રવારે બપોરના સમયે રસ્તો ક્રોસ કરતાં હતાં તે દરમિયાન પૂરઝડપે બેફીકરાઈથી આવતી જીજે-10-બીઆર-0887 નંબરની જીપના ચાલકે વૃદ્ધા અને મહિલાને ઠોકરે ચડાવી હડફેટે લેતા અકસ્માતમાં લક્ષ્મીબેન નામના વૃધ્ધાનું ઘટનાસ્થળે જ ગંભીર ઈજા પહોંચતા મોત નિપજ્યું હતું. જ્યારે સરોજબેનને શરીરે અને માથામાં ગંભીર ઈજા પહોંચી હતી. અકસ્માત બાદ ઘવાયેલા મહિલાને સારવાર માટે જામનગરની જી. જી. હોસ્પિટલમાં ખસેડવામાં આવ્યાં હતાં.
બનાવની જાણ થતા પીએસઆઈ જે.ડી. પરમાર તથા સ્ટાફ ઘટનાસ્થળે દોડી ગયો હતો અને વૃદ્ધાના મૃતદેહનો કબ્જો સંભાળી પીએમ માટે મોકલવા કાર્યવાહી હાથ ધરી મૃતકના પુત્ર જીતેન્દ્ર સોનરાતના નિવેદનના આધારે જીપચાલક વિરુધ્ધ ગુનો નોંધી આગળની કાર્યવાહી હાથ ધરી હતી.