જામનગર જિલ્લાની મેઘપર નજીક યુવાનની બાઈક આડે ગાય આવી જતા સ્લીપ થવાથી શરીરે અને માથામાં ગંભીર ઈજા પહોંચતા સારવાર માટે અમદાવાદની હોસ્પિટલમાં ખસેડવામાં આવ્યો હતો. જ્યાં તેમનું મોત નિપજ્યાનું તબીબોએ જાહેર કર્યુ હતું. જામનગર જિલ્લાના મોટી ખાવડીમાં બેશુધ્ધ થઈ જતાં પ્રૌઢનું મોત નિપજ્યું હતું.
આ અંગેની વિગત મુજબ, પ્રથમ બનાવ દ્વારકા જિલ્લાના ખંભાળિયા તાલુકાના હંસસ્થળ ગામમાં રહેતા કાલીદાસ વીરદાસ ગોંડલિયા (ઉ.વ.40) નામના યુવાન એક માસ પૂર્વે મેઘપરથી જામનગર તરફ આવતા હતાં તે દરમિયાન તેના રિલાયન્સ કંપનીના ગેઈટ સામેથી પસાર થતા હતા ત્યારે બાઈક આડે ગાય આવી જતા પડી જવાથી શરીરે અને માથામાં ગંભીર ઈજા પહોંચી હતી. ત્યારબાદ યુવાનને સારવાર માટે જામનગર અને ત્યાંથી વધુ સારવાર માટે અમદાવાદની સિવિલ હોસ્પિટલમાં ખસેડવામાં આવ્યો હતો. જ્યાં તેનું સારવાર દરમિયાન સોમવારે મોત નિપજ્યાનું તબીબોએ જાહેર કર્યુ હતું. આ અંગેની જાણ દ્વારા એએસઆઈ વી.બી. રાઠોડ તથા સ્ટાફે મૃતદેહનો કબ્જો સંભાળી આગળની કાર્યવાહી હાથ ધરી હતી.
બીજો બનાવ, જામનગર જિલ્લાના મોટી ખાવડીમાં લેબર કોલોનીમાં રહેતા ચંદ્રભુષણ કમલા નાયક (ઉ.વ.55) નામના પ્રૌઢ તેના ઘર પાસે ચાલીને જતા હતાં તે દરમિયાન એકાએક બેશુદ્ધ થઇ જતા સારવાર માટે હોસ્પિટલે ખસેડવામાં આવતા જ્યાં તેમનું મોત નિપજ્યાનું તબીબોએ જાહરે કર્યુ હતું. આ અંગેની જાણના આધારે એએસઆઈ વી.બી. રાઠોડ તથા સ્ટાફે મૃતદેહનો કબ્જો સંભાળી આગળની તપાસ હાથ ધરી હતી.
