જામનગર નજીક ઠેબા ચોકડી પાસેથી રીક્ષામાં પસાર થતા શખ્સને આંતરીને તલાસી લેતા તેમાંથી રૂા.3500 ની કિંમતની સાત બોટલ દારૂ મળી આવતા પોલીસે શખ્સની ધરપકડ કરી હતી. જામનગર તાલુકાના ઠેબા ગામમાંથી પોલીસે એકટીવા ચાલકને આંતરીને તલાસી લેતા તેના કબ્જામાંથી રૂા.1500 ની કિંમતની દારૂની ત્રણ બોટલ મળી આવી હતી. જામનગરના ગુલાબનગર વિસ્તારમાંથી પોલીસે દારૂની બોટલ સાથે શખ્સને ઝડપી લીધો હતો.
દારૂ અંગેના દરોડાની વિગત મુજબ, પ્રથમ દરોડો જામનગર નજીક ઠેબા ચોકડી પાસેથી પસાર થતી જીજે-10-ટીડબલ્યુ-6121 નંબરની રીક્ષાના ચાલકને સીટી એ ડીવીઝન પોલીસ સ્ટાફે આંતરીને તલાસી લેતા રીક્ષામાંથી રૂા.3500 ની કિંમતની સાત બોટલ ઈંગ્લીશ દારૂ મળી આવતા પોલીસે પિયુષ દિનેશ હરસોલા નામના ચાલકની ધરપકડ કરી 3500 નો દારૂ અને 60 હજાર રૂપિયાની રીક્ષા મળી કુલ રૂા.63,500 નો મુદ્દામાલ કબ્જે કરી પૂછપરછ હાથ ધરતા દારૂનો જથ્થો સુરેશ જોશી નામના શખ્સ પાસેથી ખરીદ્યાની કેફિયત આપતા પોલીસે બે શખ્સો વિરૂધ્ધ ગુનો નોંધી તપાસ આરંભી હતી.
બીજો દરોડો, જામનગર તાલુકાના ઠેબા ગામમાંથી પસાર થતા જીજે-10-બીએલ-7870 નંબરના એકસેસ સવાર દિપક માધવજી સંઘાણી નામના શખ્સને આંતરીને તલાસી લેતા તેના કબ્જામાંથી રૂા.1500 ની કિંમતની દારૂની ત્રણ બોટલો મળી આવતા પંચ એ પોલીસ સ્ટાફે દિપકની ધરપકડ કરી પૂછપરછ હાથ ધરતાં દારૂનો જથ્થો નાનક નરવાણી નામના શખ્સે આપ્યો હોવાનું જણાતા પોલીસે બે શખ્સો વિરૂધ્ધ ગુનો નોંધી 10 હજારની એકસેસ અને દારૂની બોટલો મળી કુલ રૂા.11500 નો મુદ્દામાલ કબ્જે કર્યો હતો. ત્રીજો દરોડો, જામનગર શહેરમાં ગુલાબનગર વિસ્તારમાંથી પસાર થતા રાજ કમલેશ પરમાર નામના શખ્સને સિટી બી ડિવિઝન પોલીસ સ્ટાફે આંતરીને તલાસી લેતા તેની પાસેથી રૂા.500 ની કિંમતની દારૂની એક બોટલ મળી આવતા ધરપકડ કરી આગળની કાર્યવાહી હાથ ધરી હતી.
