જામનગરના મચ્છરનગરમાં મકાનમાંથી દારૂના જથ્થા સાથે શખ્સ ઝડપાયો

જામનગર શહેરના મચ્છરનગર વિસ્તારમાં રહેતા શખ્સના મકાનમાંથી પોલીસે રેઇડ દરમિયાન રૂા.5 હજારની કિંમતની દારૂની 10 બોટલો સાથે અટકાયત કરી હતી. જામનગરના નવાગામ ઘેડ વિસ્તારમાં રહેણાંક મકાનમાંથી પોલીસે રેઇડ દરમિયાન રૂા.4 હજારની કિંમતની દારૂની 8 બોટલો કબજે કરી નાસી ગયેલા શખ્સની શોધખોળ માટે ચક્રો ગતિમાન કર્યા હતા.

દરોડાની વિગત મુજબ પ્રથમ દરોડો, જામનગર શહેરના મચ્છરનગર આશાપુરા મંદિર પાસે આવેલા બ્લોક નં.23 અને રૂમ નં.268માં ભાડેથી રહેતા કિશન રમેશ પાનસુરિયા નામના શખ્સના મકાનમાં દારૂનો જથ્થો હોવાની બાતમીના આધારે સીટી બી ડિવિઝન પોલીસે રેઇડ દરમિયાન તલાશી લેતા મકાનમાંથી રૂા.5 હજારની કિંમતની 10 બોટલ દારૂ મળી આવતાં પોલીસે કિશનની ધરપકડ કરી વધુ તપાસ હાથ ધરી હતી.

બીજો દરોડો, જામનગર શહેરના નવાગામ ઘેડ વિસ્તારમાં ખડખડનગર પાસે રહેતા શ્યામ નારણ સુવાના મકાનમાં દારૂનો જથ્થો હોવાની બાતમીના આધારે સીટી બી ડિવિઝન પોલીસે રેઇડ દરમિયાન તલાશી લેતાં મકાનમાંથી રૂા.4 હજારની કિંમતની દારૂની 8 બોટલ મળી આવતા પોલીસે દારૂ કબજે કરી શ્યામની શોધખોળ માટે ચક્રો ગતિમાન કર્યા હતા.