કાલાવડ પંથકના ખેડૂતને હૃદયરોગનો જીવલેણ હુમલો

કાલાવડ તાલુકાના ઉમરાણા ગામમાં રહેતાં અને ખેતી કરતા પટેલ પ્રૌઢને તેના ખેતરે છાતીમાં દુ:ખાવો થતા બેશુદ્ધ થઈ જવાથી કાલાવડની સરકારી હોસ્પિટલમાં ખસેડવામાં આવતા જ્યાં તેનું મોત નિપજ્યું હતું.

બનાવની વિગત મુજબ, કાલાવડ તાલુકાના ઉમરાણા ગામમાં રહેતાં અને ખેતી કરતા રમેશભાઈ નારણભાઈ ભંડેરી (ઉ.વ.56) નામના પ્રૌઢ ગત તા.6 ન રોજ રાત્રિના સમયે તેના ખેતરે હતાં ત્યારે એકાએક છાતીમાં દુ:ખાવો ઉપડતા બેશુદ્ધ થઈ જતા પ્રૌઢને સારવાર માટે કાલાવડની સરકારી હોસ્પિટલમાં ખસેડવામાં આવ્યાં હતાં. જ્યાં તેમનું ગુરૂવારે વહેલીસવારના સમયે સારવાર દરમિયાન મોત નિપજ્યાનું ફરજ પરના તબીબોએ જાહેર કર્યુ હતું. આ અંગે મૃતકના ભાઈ ઉપેન્દ્ર દ્વારા જાણ કરાતા એએસઆઇ જે.આર.જાડેજા તથા સ્ટાફે હોસ્પિટલ પહોંચી જઇ મૃતદેહનો કબ્જો સંભાળી આગળની કાર્યવાહી હાથ ધરી હતી.