ખંભાળિયામાં બાળકોને ઇજાઓ પહોંચાડનારા કૂતરાને ગ્રામ પંચાયત દ્વારા પાંજરે પુરાયું

ખંભાળિયાના શક્તિનગર વિસ્તારમાં રસ્તે રઝડતા કૂતરાઓનો ત્રાસ હોય અને આ કુતરાઓ બાળકોને કરડતાં ભારે દેકારો બોલી ગયો હતો. જે અંગે ગ્રામ પંચાયત દ્વારા તાકીદની કાર્યવાહી કરી અને આ કૂતરાને પકડી પાડી તેનો નિકાલ કરાયો હતો.

અહીંના શક્તિનગર ગ્રામ પંચાયત વિસ્તારમાં આવેલા ગાયત્રીનગર, હાઉસિંગ બોર્ડ ખાતે રખડું કુતરાઓ દ્વારા આ વિસ્તારમાં ગલીઓમાં રમતા બાળકોને મોઢાના ભાગે તથા શરીરના ભાગે કરડી અને ગંભીર ઈજાઓ પહોંચાડ્યા અંગેનો બનાવ બનવા પામ્યો હતો. આ અંગે સ્થાનિકો દ્વારા ગ્રામ પંચાયતને કરવામાં આવેલી રજૂઆતોના અનુસંધાને ગ્રામ પંચાયતના સરપંચ તથા કાર્યકરો દ્વારા તાકીદની કાર્યવાહી કરી અને આ વિસ્તારમાંથી કૂતરાને પકડી પાડી દૂરના આંતરિયાળ વિસ્તારમાં મૂકી દેવામાં આવ્યા છે. ગ્રામ પંચાયતની આ કાર્યવાહીથી આ વિસ્તારના રહીશોએ રાહતની લાગણી અનુભવી હતી.