ખંભાળિયા દાત્રાણા ગામેથી વિદેશી દારૂના જથ્થા સાથે બે શખસો ઝડપાયા, એકની શોધખોળ

ખંભાળિયા તાલુકાના દાત્રાણા ગામેથી એલસીબી પોલીસે વિદેશી દારૂની 70 બાટલી સાથે બે શખ્સોને દબોચી લીધા હતા. આ પ્રકરણમાં રાણ ગામના એક ગઢવી શખ્સનું નામ પણ ખુલવા પામ્યું છે.

આ સમગ્ર પ્રકરણની વિગત મુજબ દેવભૂમિ દ્વારકા જિલ્લા એલ.સી.બી. દ્વારા હાથ ધરવામાં આવેલા પેટ્રોલિંગ દરમિયાન ખંભાળિયા તાલુકાના દાત્રાણા ગામે એક પડતર મકાનમાં પોલીસે દરોડો પાડી, આ સ્થળે છુપાવીને રાખવામાં આવેલી રૂપિયા 28 હજારની કિંમતની 70 બોટલ વિદેશી દારૂના જથ્થા સાથે આ જ ગામના મહેશ સવદાસ ચાવડા (ઉ.વ. 21) અને કલ્યાણપુર તાલુકાના સીદસરા ગામના હરદીપસિંહ દોલુભા જાડેજા (ઉ.વ. 26) નામના બે શખ્સોને દબોચી લીધા હતા.

આ પ્રકરણમાં કલ્યાણપુર તાલુકાના રાણ ગામના હેમુ ઉર્ફે હેમત ગઢવી નામના શખ્સનું પણ નામ ખુલતા ખંભાળિયા પોલીસે ધોરણસર ગુનો નોંધી આગળની તપાસ હાથ ધરી છે.

આ કાર્યવાહી એલ.સી.બી. પી.આઈ જે.એમ. ચાવડાની સુચના મુજબ હેડ કોસ્ટેબલ મશરીભાઈ ભારવાડિયા, બોઘાભાઈ કેસરિયા, દેવશીભાઈ, લાખાભાઈ વિગેરે દ્વારા કરવામાં આવી હતી.