દેવભૂમિ દ્વારકામાં નવા ગોમતી ઘાટ વિસ્તારમાં ગૌ સેવા ટ્રસ્ટના કર્મચારી ઉપર ફાળો ઉઘરાવવા બાબતે એક શખ્સે યુવાન ઉપર છરી વડે હુમલો કરી પીઠમાં બે ઘા ઝીંકયા હતાં. હુમલામાં ઘવાયેલ યુવાન ઢળી પડતા હુમલાખોર નાશી ગયો હતો.
હુમલાના બનાવની વિગત મુજબ, આજે સવારે દ્વારકામાં નવા ગોમતી ઘાટ પર ગૌ સેવા ટ્રસ્ટના કર્મચારીઓ દ્વારા ફાળો ઉઘરાવવામાં આવી રહ્યો હતો. આ દરમિયાન એક યુવાનને ફાળો ઉઘરાવવા બાબતે એક શખ્સ સાથે બોલાચાલી થતા શખ્સે ઉશ્કેરાઈને યુવાનની પીઠમાં છરીના બે ઘા ઝીંકયા હતાં જેથી યુવાન ઢળી પડયો હતો. જાહેરમાં હુમલો થતા લોકો એકઠાં થઈ જતા હુમલાખોર નાશી ગયો હતો. ત્યારબાદ ઘવાયેલા યુવાનને સારવાર માટે રીક્ષામાં દ્વારકાની સરકારી હોસ્પિટલમાં ખસેડવામાં આવ્યો હતો. જ્યાં પ્રાથમિક સારવાર કરાયા બાદ યુવાનને જામનગરની જી.જી.હોસ્પિટલમાં ખસેડવામાં આવ્યો હતો. બનાવની જાણ થતા પોલીસ હોસ્પિટલ દોડી ગઈ હતી અને હુમલાખોરની શોધખોળ માટે ચક્રો ગતિમાન કર્યા હતાં.
