ખંભાળિયા તાલુકામાં તાજેતરમાં એક દિવસના સમયગાળામાં પાંચ ઇંચ જેટલો વરસાદ વરસ્યો હતો. આ દરમિયાન ચોમાસા પૂર્વે પીજીવીસીએલ તંત્ર દ્વારા પ્રિમોન્સુન કામગીરી કરવામાં આવી હતી. પરંતુ આ કામગીરી જાણે અપૂરતી બની રહી હોય તેમ શુક્રવારે ખંભાળિયા તાલુકાના સલાયા ગામે જીવંત વીજ વાયર તુટી પડતા ચાર જેટલા ધણખુટ- ગાયના મૃત્યુ નિપજયાનો બનાવ સામે આવ્યો છે. આ કરુણ બનાવ અંગે અહીંના ગૌભક્તો દ્વારા પીજીવીસીએલના નાયબ કાર્યપાલક ઇજનેરને એક લેખિત પત્ર પાઠવી, વિજ વાયર તૂટવાના ઉપરોક્ત બનાવને ગંભીર પણે આ બાબતને પીજીવીસીએલની બેદરકારી ગણાવી છે.
ચોમાસાના પ્રારંભમાં જ જો આવા બનાવ બને તો આગામી સમયમાં કેવી ગંભીર પરિસ્થિતિનું નિર્માણ થશે? તે બાબતે ચિંતા વ્યકત કરી, આ મુદ્દે તાકીદે પગલાં લેવા અને જો તંત્ર નિષ્ફળ જશે તો ગાંધી ચિંધ્યા માર્ગે આંદોલન કરવાની ચીમકી પણ પત્રમાં આપવામાં આવી છે.
