દેવભૂમિ દ્વારકા જિલ્લામાં છેલ્લા બે દિવસથી મેઘરાજાએ વિરામ લીધો હોય તેમ માત્ર હળવા ઝાપટા જ નોંધાયા છે. શનિવારના મેઘ વિરામ બાદ ગઈકાલે રવિવારે ખંભાળિયા અને ભાણવડ તાલુકામાં અડધો-અડધો ઈંચ વરસાદ નોંધાયો હતો.
ખંભાળિયા તાલુકામાં ચોમાસાના પ્રારંભથી જ મેઘ મહેર રહી છે. ગઈકાલે રવિવારે બપોરે ખંભાળિયા તાલુકામાં ભારે ઝાપટા રૂપે અડધો ઈંચ (15 મી.મી.) તેમજ ભાણવડ તાલુકામાં ગઈકાલે રવિવારે દિવસ દરમિયાન 16 મી.મી. વરસાદ વરસી ગયાનું નોંધાયું છે. આ સાથે દ્વારકા તાલુકાના પાંચ મી.મી. વરસાદ નોંધાયો છે.
આજે સવાર સુધીમાં સૌથી વધુ ખંભાળિયા તાલુકામાં સાડા 22 ઈંચ (563 મિલીમીટર) દ્વારકા તાલુકામાં 13 ઈંચ (323 મિલીમીટર), કલ્યાણપુર તાલુકામાં સાડા 10 ઈંચ (268 મિલીમીટર) અને ભાણવડ તાલુકામાં સવા 10 ઈંચ (258 મિલીમીટર) વરસાદ વરસી ગયો છે ગયાનું નોંધાયું છે. આજે સવારથી ખંભાળિયા પંથકમાં વરસાદી ઝાપટા વચ્ચે ઉઘાડ થયો હતો અને સૂર્યનારાયણના દર્શન થયા હતા.
