જામનગર શહેરમાં એલસીબીની ટીમે મળેલી બાતમીના આધારે ઢીચડા રોડ પર આવેલા બાલાજી પાર્કમાંથી આર્મીમાં ફરજ બજાવતા શખ્સ સહિતના બે શખ્સોને 65 બોટલ દારૂ સાથે ઝડપી લઇ બંનેની પૂછપરછ હાથ ધરી હતી.
દરોડાની વિગત મુજબ, જામનગર શહેરમાં ઢીચડા રોડ પર આવેલી બાલાજી પાર્કમાં રહેતાં અને આર્મીમાં ફરજ બજાવતા શખ્સના મકાનમાં દારૂનો જથ્થો હોવાની એલસીબીના હરદીપ ધાંધલ, મયુરસિંહ પરમાર, હરદીપ બારડને મળેલી બાતમીના આધારે પીઆઈ જે.વી. ચૌધરી, પીએસઆઇ આર.કે. કરમટા, એસ.પી. ગોહિલ, પી.એન. મોરી તથા સ્ટાફના સંજયસિંહ વાળા, હરપાલસિંહ સોઢા, ભરતભાઈ પટેલ, નાનજીભાઈ પટેલ, દિલીપભાઈ તલવાડિયા, હરદીપભાઈ ઘાઘલ, વનરાજભાઈ મકવાણા, ધાનાભાઈ મોરી, હિતેન્દ્રસિંહ જાડેજા, અરજણભાઈ કોડીયાતર, મયુદીનભાઈ સૈયદ, ક્રિપાલસિંહ જાડેજા, નિર્મળસિંહ જાડેજા, કિશોરભાઈ પરમાર, હરદીપભાઇ બારડ, ઋષિરાજસિંહ વાળા, મયુરસિંહ પરમાર, કલ્પેશભાઈ મૈયડ, ધર્મેન્દ્રસિંહ જાડેજા, દયારામ ત્રિવેદી, બિજલભાઈ બારાસરા તથા સ્ટાફે રેઈડ કરી હતી.
એલસીબીની ટીમે બાલાજી પાર્ક 2 માં પ્લોટ નં.114 માં રહેતાં કૌશલેન્દ્ર સર્વેસિંહ બૈસ (રહે.ગોહાટી-આસામ) ના મકાનમાંથી તલાસી લેતા રૂા.25,200 ની કિંમતની ઈંગ્લીશ દારૂની 63 બોટલ મળી આવતા એલસીબીએ કૌશલેન્દ્રની ધરપકડ કરી હતી. તેમજ અન્ય દરોડો જામનગરના દિગ્જામ મીલ પાસે ભક્તિનગર વોરા બિલ્ડીંગ નજીક રહેતાં અનિસિંગ વિજયસિંગ બૈસના મકાનમાંથી તલાસી દરમિયાન રૂા.800 ની કિંમતની બે બોટલ ઈંગ્લીશ દારૂ મળી આવતા એલસીબીએ બે દરોડામાં રૂા.26,000 ની કિંમતની 65 બોટલ દારૂ સાથે બે શખ્સોની ધરપકડ કરી ગુનો નોંધી વધુ તપાસ હાથ ધરી હતી.
