જામનગર શહેરના દિગ્જામ સર્કલ પાસે રહેતી પત્નીને લેવા આવેલા પતિને લખાણ કર્યા વગર મોકલવાની ના પાડી રસ્તમાં રોકી બે શખ્સોએ છરી વડે અને લોખંડના કડા વડે હુમલો કર્યાના બનાવમાં પોલીસે તપાસ આરંભી હતી.
બનાવની વિગત મુજબ, રાજકોટ ઘંટેશ્ર્વર એસઆરપી કેમ્પ પાસેના બાપા સીતારામ ચોકમાં રહેતાં આકાશ ચંદુગીરી ગોસ્વામી (ઉ.વ.22) નામનો યુવક જામનગર શહેરમાં દિગ્જામ સર્કલ પાસે રહેતી તેની પત્નીને માવતરે લેવા માટે રવિવારે સાંજે આવ્યો હતો. તે દરમિયાન જયેશ ઉર્ફે બાબુ રમેશ રાઠોડ અને દિપક ઉર્ફે દિપુ શશી પરમાર નામના બે શખ્સોએ યુવતીને લખાણ કર્યા વગર મોકલવાની ના પાડી પતિ આકાશ સાથે બોલાચાલી કરી હતી. ત્યારબાદ આકાશ સહિતના બે યુવાનોને બંને શખ્સોએ રસ્તામાં આંતરીને છરી વડે તથા લોખંડના કડા વડે હુમલો કરી બંને યુવાનોને ઈજા પહોંચાડી હતી. બાદમાં બનાવ અંગેની આકાશ ગોસ્વામી દ્વારા જાણ કરાતા પીએસઆઈ આર.કે. ખલીફા તથા સ્ટાફે બે શખ્સો વિરૂધ્ધ હુમલાનો ગુનો નોંધી તપાસ આરંભી હતી.
