જામનગર શહેર જિલ્લામાં કોરોનાના ભયાનક સંક્રમણને પગલે જી.જી. હોસ્પિટલમાં ઉભરાઇ રહેલા દર્દીઓ તથા તેના સગા-સંબંધીઓના ધસારાને કારણે જી.જી. હોસ્પિટલ પરિસર તેમજ આજુબાજુના વિસ્તારમાં કોરોના સંક્રમણ બેકાબુ થવાની દહેશત ઉભી થઇ છે. આ વિસ્તારમાં સંક્રમણનો વિસ્ફોટ ન થાય તે માટે સાવચેતીના ભાગરુપે જી.જી. હોસ્પિટલ સામે આવેલી દવાની દુકાનો સિવાયની તમામ દુકાનો તંત્ર દ્વારા બંધ કરાવવામાં આવી છે. હોસ્પિટલ સામે આવેલી આ દુકાનો પર લોકોની ખાસ કરીને દર્દીના સગા-સંબંધીઓની ચીજવસ્તુઓ તેમજ ખાદ્ય પદાર્થો લેવા માટે ભારે ભીડ રહેતી હોય. અહીં કોરોના સંક્રમણ ફેલાવાની શકયતાઓ ખૂબ જ વધી જવા પામી છે. જેને પગલે તંત્ર દ્વારા આ કાર્યવાહી કરવામાં આવી છે. હોસ્પિટલ સામેના દુકાનદારો તેમજ અહીં આવતાં લોકો કોરોનાના સુપર સ્પ્રેડર ન બને તે માટે આ પગલું ખૂબ જ જરૂરી હોવાનું માનવામાં આવી રહ્યું છે. આવતીકાલથી ત્રણ દિવસ માટે શહેરમાં સ્વૈચ્છિક લોકડાઉનનો પ્રારંભ થઇ રહ્યો છે. ત્યારે હોસ્પિટલ સામે આજથી જ તકેદારીના ભાગરૂપે લોકડાઉનની કવાયત હાથ ધરી દેવામાં આવી છે.
